Kur mbeten edhe 24 orë nga mbledhja e Komisionit Qendror të Zgjedhjeve që do të vendosë nëse do të pranojë kërkesën e grupit “Alibeaj” apo Partisë Demokratike drejtuar nga Sali Berisha për të hyrë në zgjedhjet e 14 majit, në skenën politike zhvillimet po bëhen të vrullshme.
Kështu gjatë paradites lëvizje pati në selinë e PS, ku ambasadorja Yuri Kim qëndroi për 30 minuta në një takim “kokë më kokë” me Sekretarin e Përgjithshëm të kësaj force politike, Damian Gjiknuri, ndërsa më pas do t’i shkojë në zyrë edhe kreut të PL, Ilir Meta.
Por, njëkohësisht ka zhvillime në kampin blu, pasi në zyrën e Berishës ka shkuar kryetari i Partisë Agrare Ambientaliste (PAA), Agron Duka.
Në takimin që Berisha po zhvillon me Dukën besohet se temë diskutimi do të jenë pikërisht zgjedhjet lokale, pasi ish-kryeministri ka lenë të hapur derën për të gjithë aleatët opozitarë që të bëhen pjesë e koalicionit me Partinë e Lirisë dhe PBDNJ.
Ndërkohë, në KQZ ditën e sotme do të shqyrtohen kërkesat e 42 partive politike për t’u regjistruar në zgjedhje si dhe të 4 kandidatëve të pavarur.
