Policia e Tiranës ka arrestuar shoferin 23-vjeçar që shkaktoi aksidentin e frikshëm mbrëmjen e djeshme në rrugën “5 Maji” në Tiranë.
Uniformat blu bëjnë me dije se si pasojë e manovrave të rrezikshme, shoferi me iniciale K.R u përplas me një makinë tjetër dhe për pasojë shkaktoi në total 6 të plagosur.
“Specialistët e Qarkullimit Rrugor arrestuan shtetasin kosovar K. R., 23 vjeç, banues në Tiranë dhe nisi procedimi në gjendje të lirë për shtetasin E. P., 25 vjeç, banues në Tiranë, për veprën penale “Shkelja e rregullave të qarkullimit rrugor, pasi mbrëmjen e djeshme, në rrugën “5 Maji”, shtetasi K. R., duke drejtuar automjetin, për shkak të një manovre të gabuar, është përplasur me automjetin me drejtues shtetasin E. P.
Si pasojë janë dëmtuar shtetasi K. R. dhe pasagjerja në automjetin e tij, shtetasja A. R., si dhe pasagjerët e automjetit tjetër, shtetasit D. F., D. F., E. F. dhe M. B., të cilët ndodhen nën kujdesin e mjekëve”, njofton policia.
Materialet i kaluan Prokurorisë, për veprime të mëtejshme procedurale.
