Trajneri i Tiranës, Orges Shehi, e ka cilësuar ndeshjen e sotme si një objektiv të realizuar për skuadrën që kërkonte një rezultat të rëndësishëm që në përballjen e parë në Kupë ndaj Kastriotit. Dhe me fitoren e thjeshtë 4-1 në transfertë, kualifikimi pa shumë sforco duket i sigurt.
“Rezultati na jep kënaqësi. Kupa ka specifikë të veçantë, pasi me pak ndeshje merr trofe që është i rëndësishëm. Sot ruajtëm pak energjitë, u munduam të bëjmë zëvendësime por edhe llogaritëm energjitë që të marrim rezultatin që kërkojmë. Rezultati na jep kënaqësi për vazhdimësinë.
Na shërben për anën psikologjike të lojtarëve, përpos që rezultati është primar dhe na intereson për vazhdimësinë. Por edhe shënimi nga lojtarët na jep kënaqësi, se ana a psikologjike për sulmuesit është e rëndësishme. Pastaj provuam edhe Isenin në të majtë dhe dha sinjale pozitive.
Oshilacionet te të gjithë skuadrat janë të dukshme se kampionati këtë vit është shumë rivalizues dhe skuadrat kanë pak diferencë me njëra-tjetrën. Aq më tepër në fazën mbrojtëse janë të organizuar të gjithë dhe është e vështirë të depërtosh, nëse pëson i pari, ka shumë vështirësi të kthesh ndeshjen. Kupa dhe kampionati kanë specifikë të veçantë, kjo vjen nga fakit që pas 3 ditësh kishim ndeshje me intensitet të lartë, lodhja bën të vetën dhe Kupa me kampionatin ka diferencë”, tha Shehi për “Oversport” pas përfundimit të ndeshjes.
