Kreu i Partisë Demokratike Sali Berisha, u ka bërë thirrje shqiptarëve të Komunës së Tuzit , të bëhen bashkë në 5 mars për të votuar kandidatët e “Forumit Shqiptar”.
Përmes një video të publikuar në rrjetin e tij social fb, Berisha thotë se bashkimi i shqiptarëve në Tuz është në interes jo vetëm të tyre, por të të gjithë shqiptarëve kudo që ndodhen.
“Të dashur Banorë të Tuzit. Me këtë mesazh miqësor, së pari dua t’ju përshëndes ju përzemërsisht kudo që jeni. Gjithashtu dua edhe njëherë të shpreh vlerësimin tim më të madh për ju, rolin tuaj të kahershëm, shumë të rëndësishëm në historinë e kombit tonë. Me vizionin tuaj ju arritët të shndërronit Tuzin në Komunë. Kjo ishte një arritje e madhe për të gjithë shqiptarët kudo ku janë.
PD ka pasur dhe ka marrëdhënie shumë të mira me forcat politike shqiptare kudo që janë. Në emër të PD-së, me rastin e zgjedhjeve të 5 marsit, unë ftoj të gjithë banorët e Tuzit, kudo ku ndodhen, të bashkojnë votën e tyre në zgjedhjet për kandidatët e Forumit shqiptar. Në këtë mënyrë ju keni votuar për Tuzin, për të ardhmen dhe unë kam bindjen se bashkimi juaj do të jetë në interes të gjithë shqiptarëve kudo që janë”, është shprehur Berisha.
