Jashtë ambienteve të Kuvendit ka nisur protesta e opozitës. 8 deputetët e përjashtuar, mes tyre Kryetari i PD Sali Berisha dhe Sekretari i Përgjithshëm i PD Flamur Noka, nuk do të jenë prezentë në punimet e Kuvendit dhe po mbajnë fjalën e tyre në protestën që po zhvillohet jashtë.
Flamur Noka ka deklaruar se garda përdoret nga kryeministri Rama për të dhunuar deputetët e opozitës. Ai shton se Rama është i kapur në flagrancë duke minuar demokracinë në Shqipëri.
Ai u shpreh se kryeparlamentarja Lindita Nikolla u ndërpret fjalën deputetëve të PD sa herë përmendet Edi Rama, ndërsa këtë të fundit e cilësoi si anti amerikanin më të madh pas Enver Hoxhës.
“Jemi sot këtu për të na dëgjuar ju. E patë skenën, një skenë e turpshme. Garda përdoret për të dhunuar deputetët. Për të ndaluar deputetët e opozitës që të hynë aty për t’ju përfaqësuar ju. Edi Rama urdhëron bllokimin e Kuvendit, bllokimin e zërit të opozitës.
Edi Rama ka frikë nga e vërteta. Edi Rama është i kapur peng. Është i kapur në flagrancë duke minuar demokracinë në Shqipëri. Po kërkojmë një të drejtë që është fituar në Dhjetorin e vitit 1990. Po kërkojmë të përcjellim zërin tuaj aty. Sa përmendet emri i Edi Ramës, Linda e parlamentit e ndërpret fjalën. Ku është thelbi? Rama u kap me një veprim kundër partnerit tonë strategjik. Pas Enver Hoxhës, Edi Rama është anti-amerikani më i madh që ka njohur historia”, u shpreh Noka.
