“Nuk do të ketë komision deri sa të bëjmë ligjin e ri”, u shpreh para disa ditësh kreu i grupit parlamentar socialist Taulant Balla. Në argumentin e mazhorancës për t’i thënë jo opozitës për ngritjen e komisionit për të hetuar kryeministrin Edi Rama për lidhjet e tij me ish zyrtarin e FBI-së, juristët nuk gjejnë asnjë bazë ligjore.
Ledi Bianku, ish-anëtar i Gjykatës Kushtetuese në Gjykatën Europiane për të drejtat e Njeriut e cilëson sjelljen e PS absurd në raport me Kushtetutën.
“Veprimi i një ligji nuk mund të pezullohet me argumentin se po bëjnë ndryshime. Është absurd. Duhet vendim i Gjykatës Kushtetuese ose abrogimi i tij nga Parlamenti”, tha Bianku.
Një forcë politike e cila ka mazhorancën në Parlament, sipas juristi Jordan Daci, nuk mund të zbatojë ligjin dhe Kushtetutën sipas interesave partiake.
“Ngritja e Komisionit hetimor është detyrues për parlamentin. Mjaftojnë 35 firma. Nuk ka vakum kushtetues për ngritjen e komisioneve hetimore. Ligji që është sot është i mjaftueshëm, prandaj nuk mund të themi që nuk zbatojmë kushtetutën se ky ligj ka një boshllëk”, u shpreh juristi Daci.
Socialistët, përveç deklaratave politik, nuk kanë marrë vendim në konferencën e kryetarëve apo në Parlament për të refuzuar kërkesën e demokratëve. Por kjo, sipas juristëve, nuk bëhet pengesë që opozita ta çojë në Gjykatë Kushtetuese.
“Kemi një Kuvend që nuk merr vendimet siç duhet t’i marrë. Është e qartë që ka një mosveprim dhe një problem kushtetues. Konflikti është ndërmjet një palë me një palë tjetër në Kuvend, prandaj mund të bëhet objekt i posaçëm i kushtetutës kjo situatë”, shtoi Daci.
Për politologun Afrim Krasniqi situata në Parlament është larg të qenit normal, dhe sipas tij refuzimi i mazhorancës socialiste ndikon negativisht mbi vetë kryeministrin Rama dhe drejtuesin e Kuvendit.
“Vetë kryeministri dhe çdo zyrtar tjetër duhet të përballet me hetim, se në rastin kur refuzon hetimin tregon që ka një problem dhe frikë nga hetimi. Në rast se refuzohet ngritja e komisionit hetimor dhe do të ketë më vonë një vendim gjykata për ta ngritur duhet të ketë dorëheqje të menjëhershme të drejtuesve të Kuvendit”, u shpreh Krasniqi.
Konfliktet politike dhe mosgjetja e dakordësisë, juristët mendojnë që ka shkaktuar një anomali në frymën kushtetuese, pasi sipas tyre nuk mund ti adresohesh gjykatës për çdo rast që nuk zgjidhet në parlament.
/A2 News/
