Vrasja aksidentale e shqiptarit në një kafene në “Nea Joni”, teksa kishte dalë për të parë një ndeshje futbolli, i ka tronditur të gjithë.
37-vjeçari shqiptar që mbeti viktimë “kolaterale” pas përplasjes me armë zjarri të dy grupeve me shqiptarë në zonën VIP të lokalit ku ndodhej, është identifikuar nga vëllai i tij.
Ai është shtetasi shqiptar Pellumb Islami dhe sipas informacioneve të shpërndara nga mediat greke punonte si hidraulik në Athinë.
Viktima nuk kishte asnjë lidhje me dy grupet e shqiptarëve të përfshirë në sherr, por plumbi e ka kapur rastësisht teksa shihte ndeshjen e futbollit.
Mediat greke gjithashtu raportojnë se në vendngjarje ka pasur shkëmbim zjarri, me anëtarë të të dy grupeve që kanë qëlluar në drejtim të njëri-tjetrit.
Mësohet se njëri grup përbëhej nga 4 anëtarë dhe tjetri nga 3, të gjithë shqiptarë. Ata dyshohet se janë nga jugu i Shqipërisë dhe konsiderohen persona me rrezikshmëri të lartë, të përfshirë në grupe kriminale të trafikut të drogës në qendrën e Athinës.
Të dhënat e fundit gjithashtu tregojnë se dy makinat luksoze që lanë pas shtatë autorët e vrasjes në Nea Joni, janë marrë me qira nga një zyrë në qendër të Athinës.
Efektivët e policisë , të cilët kanë shkuar në vendngjarje që në momentin e parë, kanë kryer kontrollin e plotë të makinave, për të identifikuar identitetin dhe në vijimësi, arrestimin e autorëve që qëlluan dhe lanë të vrarë 37-vjeçarin.
Policia ka marrë kontratat e qirasë në zyrën që ka lëshuar makinat dhe në to përmenden emra shqiptarësh.
Tashmë po hetohet nëse këta emra korrespondojnë me persona realë, për të gjetur prova për identifikimin e autorëve.
Si ndodhi ngjarja
Gjithçka nisi rreth orës 23:40 kur një grup shqiptarësh, 7 persona, hynë në lokalin me shisha. Ata nisën të debatonin menjëherë. Më pas ata dolën nga lokali duke bërtitur dhe duke vazhduar zënkën e tyre. Nuk dihet ende arsyeja e sherrit mes 7 shqiptarëve.
Kur sherri u ndez edhe me shumë, njëri prej tyre ka nxjerrë një pistoletë dhe ka nisur të qëllojë. Një nga plumbat kapi shqiptarin që s’kishte asnjë lidhje me grupin që po debatonte. Ai u plagos rëndë, e për rrjedhojë ndërroi jetë në spital.
7 shqiptarët e përfshirë nuk janë identifikuar. Rastin e ka marrë nën hetim Departamenti i Vrasjeve, ku policia ka grumbulluar nga vendngjarja shtatë gëzhoja dhe një plumb të deformuar nga një pistoletë 9 kalibërshe, ndërsa është vënë në kërkim të personit që ka qëlluar përmes kamerave të sigurisë së dyqanit.
Hetuesit që po trajtojnë rastin i kanë kushtuar vëmendje të veçantë makinës tip “Cadillac” të gjetur në afërsi të kafenesë së rrugës Kastamonis dhe që dyshohet se i përkiste njërit prej shtatë shqiptarëve.
