Edi Rama u shfaq sot pasi Lindita Nikolla ka përjashtuar 18 deputetë të PD, e pasi protesta e opozitës para Parlamentit përfundoi.
Kjo dalje e shefit të qeverisë erdhi rreth një muaj pas shpërthimit të skandalit McGonigal dhe fshehjes nga syri i qytetarëve që i shkuan poshtë zyrës më 11 shkurt për t’i kërkuar llogari, por edhe mungesës në Kuvend sa herë është kërkuar interpelancë apo mocion me debat me të.
Shefi i qeverisë nuk e mori mundimin të fliste në Kuvend, por u prit me pankarta ironizuese nga deputetët e mbetur të PD-së në sallë, në lidhje me aferën ku del se ka korruptuar me 225 mijë euro ish-zyrtarin e FBI-së.
Në tentativën për ta shtyrë sa më shumë llogaridhënien, për të folur për Ramën jashtë Kuvendit doli kreu i Grupit të PS, Taulant Balla, i cili deklaroi pas përfundimit të seancës se mocioni me debat do të mbahet në 2 mars, vetëm një ditë para protestës së paralajmëruar nga kryedemokrati Sali Berisha dhe vendimit në gjykatën e Apelit për vulën e PD.
Sipas Ballës, ky vendim është marrë për shkak të axhendës ndërkombëtare të kryeministrit ndër arsye të tjera, që përfshijnë edhe faktin se për socialistët Parlamenti nuk është “Fast-Food”.
“Çdo deputet gjithashtu duhet të ketë kohën e duhur për t’u përgatitur”, tha Balla.
Më tej kreu i Grupit të PS shtoi: “Së pari kërkesa për zhvillimin e mocionit me debat ka kërkuar vënien në dispozicion të një dite të plotë ku të hiqen të gjitha çështjet që mund të ketë seanca dhe të jetë e dedikuar, e cila po ta llogarisim nëse flet secili nga 10 minuta I bie rreth 24 orë. Në këtë këndvështrim, ne nuk jemi një fast food, por institucion ku duhet të përgatitet çdo deputet për atë që do flasë. Opozita 2 marsin e ka ditë të shënuar mendoj se do ishte data më e mirë. Neni 89 në rast se nuk gjendet dakordësia votohet propozimi i kryetarit të Kuvendit. Në këtë aspekt tashmë nuk ka më asnjë alibi për normalitetin. Koha në dispozicion për tu përgatitur është e mjaftueshme. Presim deputetët të jenë prezent”.
