Partia Demokratike ka kërkuar shkarkimin e Lindita Nikollës nga kryetare e Parlamentit dhe për këtë kërkesa e tyre po shqyrtohet nga Këshilli për Legjislacionin.
Seanca e sotme drejtohej nga nënkryetarja, Ermonela Felaj, e cila sqaroi edhe procedurën se pse sot seanca nuk drejtohet nga Nikolla.
“Kërkesa paraqitet sipas pikës një të nenit dhe shqyrtohet nga këshilli i legjislacionit, i cili është mbledhur rregullisht në dy mbledhje dhe paraqet raportin përkatës. Në rast se kërkohet Këshilli për Legjislacionin janë të detyruar ta dëgjojnë kryetaren e kuvendit. Në këtë rast seanca drejtohet nënkryetari i shumicës parlamentare”, tha Felaj.
Ndërkohë Edi Rama prej më shumë se 4 seancash nuk ka marrë pjesë në Kuvend duke bojkotuar seancat plenare, ndërkohë që Berisha vazhdimisht i ka kërkuar mazhorancës socialiste që të thërrasë Ramën dhe të japë llogari për implikimin e tij në aferën “McGonigal”.
Kujtojmë që disa deputetë të Partisë Demokratike së bashku me Sali Berishën janë përjashtuar nga Kuvendi me pretendimin se kanë bllokuar foltoren.
