Ka përfunduar mbledhja e grupit parlamentar në selinë blu dhe menjëherë deputetët e Partisë Demokratike janë nisur drejt Kuvendit të Shqipërisë. Ndërkohë kreu i demokratëve Sali Berisha ende nuk ka dalë nga selia e PD-së për t’iu bashkuar protestës që do të zhvillohet përballë Parlamentit.
Ndërkohë që deputeti i Partisë Demokratike, Luan Baçi theksoi se deputetë demokratë të përjashtuar nga Kuvendi do të futen brenda seancës plenare për të bërë detyrën e tyre. Sipas Baçit, përjashtimi i deputetëve demokratë nga Lindita Nikolla është i paligjshëm dhe jashtë rregullores.
“Në fakt nuk është protestë, ne po vijmë për t’u futur në parlament, qytetarët po na shoqërojnë, do ta provojmë të futemi. Duam thjesht të bëjmë detyrën. Beteja opozitare bëhet në parlament. Përjashtimi është i jashtëligjshëm, jashtë rregullores. Me të njëjtin motivacion janë përjashtuar dhe katër deputet të tjerë, pa fakte, absolutisht është skenar i përgatitur nga Rama. Nuk do të përballet me opozitën.” ishin fjalët e Luan Baçi.
