I ashtëquajtur “Bordi i Transparencës” i ngritur nga kryeministri Edi Rama është shndërruar prej mëse një viti në një “hall” për xhepat e shqiptarëve dhe sot ka vazhduar talljen me qytetarët.
Teksa të gjithë e prisnin shkrirjen e Bordit komunist në fund të janarit, ditën e sotme ata morën vendimin për të rritur çmimin e karburantit në vend.
Në mbledhjen e fundit, “Bordi i Ramës” vendosi që të rrisë çmimin e naftës me 5 lekë, ndërsa benzinën me 4 lekë. Me vendimin e ri benzina ka shkuar në kuotën e 189 lekë/litri, kurse nafta nga sot pasdite do të kushtojë 195 lekë/litri. Ndërkohë gazi do të tregtohet 80 lekë/litri.
Çmimi i naftës në bursën ndërkombëtare prej më shumë se një muaji është në “pikiatë”, kurse bordi i ngritur nga kryeministri Edi Rama abuzon dhe tallet me xhepat e shqiptarëve duke bërë një tjetër rritje të pabesueshme në një kohë kur po përflitet për shkrirjen e tij.
Operatorët e tregut pohojnë se nëse Bordi nuk do të ndërhynte, çmimet do të ishin të paktën 5-10% më lirë, pasi kompanitë do të ishin fleksibël të merrnin vetë përsipër rrezikun dhe të blinin më shumë sasi kur çmimi të ishte më i lirë në tregje, ndërsa tani janë të detyruar të bëjnë blerje në baza ditore për shkak të ndërhyrjeve të Borit.
Kujtojmë që opozita ka kërkuar “shkrihen” në mënyrë urgjente të bordeve të cilat etiketohen si “komuniste” pasi abuzojnë me çmimet në dëm të xhepave të qytetarëve.
