Më pak se 24 orë kanë kaluar nga protesta e djeshme para Parlamentit dhe Partia Demokratike nuk humb kohë duke lajmëruar një mbledhje të Kryesisë në selinë blu.
Mbledhja e thirrur nga kryedemokrati Sali Berisha pritet të nisë pas orës 13:00, ndërsa do të ketë edhe një deklaratë për mediat ndoshta për të treguar disa nga hapat që do të ndiqen për organizimin e tubimit të radhës, të enjten përpara Parlamentit.
Ditën e djeshme opozita mbajti një protestë para parlamentit, e dyta brenda tre ditësh, pasi të shtunën zhvilloi një tjetër tubim kombëtar që u mbaj në Bulevardin “Dëshmorët e Kombit”, para Kryeministrisë.
Beteja e opozitës tashmë ka në fokus aferën “McGonigal”, skandal i cili mori vëmendje maksimale mbrëmjen e djeshme në Kuvend dhe në shesh, aty nga ku Berisha bëri me dije se revolucioni demokratik që PD kërkon deri në dorëheqjen e Edi Ramës nuk do të ndalet.
