Kryetari i Partisë Demokratike, Sali Berisha theksoi këtë të Shtunë nga podumi i protestës para kryeministrisë se opozita është e vendosur në largimin e Edi Ramës nga pushteti.
Berisha tha se protestat do të jenë të vazhdueshme dhe lajmëroi se e radhës do të zhvillohet ditën e Hënë para parlamentit, kur planifikohet të mbahet dhe seanca e radhës plenare.
“Jemi në një mision të shenjtë kundër një shteti që sillet më keq se çdo pushtues osman, nazist, fashist, diktaturë që ka njohur Shqipëria gjer më sot. Edi Ramës ia kemi prerë biletën, kthim pas nuk ka! Misionarë si ne, nuk i ndalon dot asgjë! Ne kemi të vërtetën, ne kemi idealet, ne kemi dashurinë tonë për këtë vend dhe për këtë tokë. Ne kemi besnikërinë tonë ndaj miqve tanë. Ne, asgjë nuk mund të na pengojë në këtë rrugë. Edi Rama e ka shndërruar parlamentin në një turp të historisë tonë kombëtare, më keq se parlamenti i Putinit dhe Lukashenkos”, tha Berisha.
“Aty ai shfrytëzon çdo mekanizëm për të përjashtuar përfaqësuesit tuaj nga përmbushja Dita e hënë është ditë parlamenti. Revolucioni na fton, të gjithë para parlamentit. Populli i protestës, populli i fitores, të gjithë të bashkohemi të kalojmë nga beteja në betejë deri në fitoren tonë përfundimtare. Edi Rama, harroje se mund të përjashtosh këtë popull nga vota dhe zgjedhjet. Jo Surreli, po as Biza dhe Martaneshi nuk i pengon këta që të të gjejnë deri në vrimën e miut dhe të japin atë që meriton. Së fundmi, edhe njëherë, një mirënjohje të pakufishme për ju në këtë shesh. Ju ftoj të vazhdojmë marshin e lirisë, të vazhdojmë marshin e fitores”, shtoi ai.
Një pjesë të fjalimit të Berishës e zuri çështja “McGonigal” dhe lidhjet me Edi Ramën.
“Pas këtij akti të pabesë ndaj aleatit të madh të kombit shqiptar, SHBA, Edi Rama nuk është më legjitim”, tha Berisha.
Kreun e qeverisë Rama e quajti “një rrezik madhor për sigurinë e Shqipërisë, rajonit dhe më gjerë”.
Ai kërkoi hetim nga SHBA dhe BE për sulmet ndaj opozitës.
“Nga kjo tribunë, në emrin tuaj, në emrin e shqiptarëve që janë sot dhe që mbyllën sytë për ideale demokratike, i bëj thirrje qeverisë së SHBA, Kongresit, institucioneve të vendit të madh, të hetojnë të gjithë çfarë ndodhi këto ditë me opozitën shqiptare. Të hetojnë veprimtarinë e Sorosit në Shqipëri, se si ky multimilairder bëri gjithçka për të ngritur në piedestal këtë kryekorruptor”, apeloi ai.
Po ashtu, Berisha premtoi ulje takash dhe më shumë mbështetje për qytetarët se ardhjen e PD në pushtet.
Pas fjalës së kryedemokratit, nisi edhe shpërndarja e qytetarëve nga sheshi para kryeministrisë dhe nisi një marshim. Berisha u ndal pranë ministrisë së Brendshme, Bashkisë së Tiranës dhe KQZ-së, nga ku dha disa mesazhe.
Protesta para kryeministrisë ishte e qetë. Në një moment, protestues hodhën shashka dhe tymuese para derës kryesore të kryeministrisë, megjithatë nuk pati përplasje me policinë.
