Tre institucione zgjodhi kryetari i PD-së, Sali Berisha për të dhënë disa mesazhe pas fjalës së mbajtur në podiumin e protestës para kryeministrisë.
Pas kryeministrisë, Berisha i shoqëruar nga protestues, u ndal fillimisht te bunkeri pranë Ministrisë së Brendshme, nga ku kërkoi dorëheqjen e ministrit Bledi Çuçi.
“Erdhëm këtu për t’i dhënë një mesazh ministrit të familjes Çuçi, i cili është një anëtar familjar i organizatës kriminale të Edi Ramës se ai duhet të japë urgjentisht bashkë me Edi Ramën dorëheqjen. Ky marshim pranë shtyllave kryesore është paqësor sot, por ky ka objektivat e veta taktike dhe strategjike. Do t’i mësoni në ditët në vazhdim. Sot, kaluam para parlamentit ditën e hënë revolucioni është para parlamentit”, deklaroi Berisha.
Më tej, marshimi vijoi te Bashkia e Tiranës. Prej, aty kryedemokrati tha se Veliaj e ka vendin në burg. Ai u shpreh se “revolucioni do të flasë me të”.
“Njeriu që ka uzurpuar këtë zyrë të nderuar të qytetarëve shqiptarë është një nga hajdutët më të shpifur, më të neveritshëm që ka patur qyteti ndonjëherë. Ne erdhëm këtu për të dhënë mesazhin tonë. Vjedh ditën dhe natën qytetarët shqiptarë. Ky nuk ka të drejtë të hyjë asnjë ditë në këtë ndërtesë, ky njeri vjedh, ka shndërruar fushën e Sharrës në minierë floriri për veten dhe familjet e tyre. Vjedhin çdo qytetar të qarkut Tiranë. 18 Euro për ton sepse kontrata thotë për çdo ton plehra që depozitohen do paguhen 11 Euro. Ky njeri vjedh 18 Euro në çdo ton. Deri tani janë bërë në llogaritë offshore të Edi Ramës dhe Erion Veliaj vetëm nga fusha e Sharrës 54 milionë Euro të vjedhura. Erion Veliaj është një hajdut më të shpifur të historisë së Tiranës dhe Shqipërisë. Ka vendosur taksën për arsimin dhe ky hajdut ndërton shkolla me çmim të dhjetëfishtë, të 8-fishtë krahasuar me çminin që del nga manualet europiane të ndërtimit të një shkolle. Ky hajdut që është turpi i dheut, fillon hap tenderin tek rruga Gjon Belushi. E ndërton atë me fondet e bashkisë dhe paratë i fut në xhepin e vetëm me një firmë false. Ky do nxjerrë 1 minutë e më parë nga çdo strofull, ky vendin e ka në burg. Revolucioni do flasë me të”, deklaroi.
Ndalesa e fundit ishte jashtë selisë së Partisë Socialiste.
“Merreni këtë ardhje te selia juaj, mereni si mesazh për ju dhe si armë denoncimi të këtyre që vendin e kanë në burg“, theksoi kryedemokrati.
“Ju siguroj se aq sa kanë ata respekt për lirinë dhe votën e tjetrit aq ka dhe Berisha respekt për ta. Kjo ndërtesë është shndërruar në simbol të së keqes, prej Edi Ramës i cili me ldihjet e tij me krimin ka përzënë nga vendi që nga 2014-a, mijëra qytetarë të të gjitha bindjeve. Erdha t’ju them se në piramidën e krimit e të drogës nuk është i vetëm, e kam denoncuar dhe do vazhdoj ta bëj. Këta s’mbrojnë interesat e socialistëve por të pasurimit të tyre. Merr Gjiknurin, o socialistë të ndershëm…”, tha Berisha.
“Të nderuar socialistë të ndershëm, nëse Alda Klosit iu gjetën 700 mijë euro, Damianit tuaj i kanë humbur 6 milionë euro. Po ku i mori ai ato?! Vendi i tij është vetëm në burg. Jemi në betejë me ta. Po Xhaçka, më thoni pak. Ajo me skemat piramidale se s’po flas më tutje se i dini vetë. Me çfarë merite e bëri Xhaçka burrin investitor strategjik, e ëma e saj ka qenë në ndjekje penale për trafik fëmijësh. Çfarë ju lidh ju o shokë socialistë me këta individë fund e krye krim. Merreni këtë ardhje te selia juaj, mereni si mesazh për ju dhe armë denoncimi të këtyre që vendin e kanë në burg”, shtoi ai.
Më tej, Berisha dhe mbështetës u drejtuan për te selia e PD-së, nga ku deklaroi përfundimin e protestës.
“Dhamë një mesazh se revolucioni ynë është një betejë jetike, një mision i shenjtë për demokracinë dhe pluralizmin. Shpërndahemi tani, të betuar, të vendosur më shumë se kurrë për të vazhduar revoluacionn deri në përmbysjen e plotë të monizmit në Shqipëri, gjer në fitoren e plotë”, tha ai.
Më tej, ai bëri me dije se protestues janë ndaluar nga policia dhe bëri apel që ata të lirohen: I kërkoj policisë të lirojë protestuesit.
Kreu i PD-së kujtoi se protesta e radhës do të mbahet të Hënën para parlamentit në 17:00, kur është planifikuar të zhvillohet te protesta e radhës. Nëse ndryshon orari i seancës, do ndryshojë dhe orari i protestës, tha ai.
