Një çift të moshuarish u gjetën të pajetë në banesën e tyre, në fshatin Rrapëz të Lushnjes, pasi fqinjët e tyre ngritën alarmin se nuk i kishin parë të dilnin jashtë prej tre ditësh.
Efektivët hynë nga dritarja, duke zbuluar të vdekur në krevatet e tyre Islam dhe Qelibare Kalliri, përkatësisht 90 dhe 81 vjeçe.
Edhe pse të moshë të thyer, ata jetonin të vetëm në apartament dhe u larguan nga kjo botë po bashkë, ndërsa dyshimet e policisë janë se të moshuarit janë asfiksuar nga rrjedhja e gazit në banesë.
Për mediat kanë folur sakaq fqinjët e tyre, të cilët shprehen se dy të moshuarit ishin të sëmurë dhe jetonin vetëm.
“Kanë qenë të sëmurë, dilnin nga pak. I shërbenin njëri-tjetrit”, tha një prej fqinjëve të viktimave.
Një tjetër banore që jetonte pranë tyre, u shpreh se ata “kishin tre ditë që nuk kishin dale, ndaj u njoftua policia”.
“Ngroheshin me gaz. Sobën e hoqën, e shitën”, shtoi ajo.
Duke reaguar për ngjarjen, policia tha se trupat e pajetë u gjetën rreth orës 10:40 të së shtunës.
Policia tha se grupi hetimor po punon për sqarimin e plotë të rrethanave të ngjarjes, ndërsa mjekësia ligjore do të përcaktojë shkakun e saktë të vdekjes.
