Gjykata e Apelit në Tiranë ka urdhëruar organin e akuzës që të nisë hetimet, pas kallëzimit të bërë nga prindërit e një foshnje vetëm 1 vjeçe. Djali i mitur dyshohet se është infektuar me HIV në ambientet e Pediatrisë së kryeqytetit.
Ajo që e përforcon më shumë dyshimin e prindërve është fakti se si nëna dhe babai, janë të dy negativë. Në këto kushte, ata kanë akuzuar bluzat e bardha në Pediatrinë e Tiranës se nuk kanë marrë masat e nevojshme dhe për pasojë e mitura është infektuar me HIV.
Çështja e tyre nuk është vlerësuar nga autoritetet dhe dy prindërit kanë apeluar në Gjykatën e Apelit, e cila sot ka vendosur të urdhërojë Prokurorinë e Tiranës që të nisë hetimet dhe të zbulojë shkakun e infektimit të foshnjës 1 vjeçe dhe a ka pasur neglizhencë nga ana e mjekëve.
Më 27 nëntor 2021, prindërit e vogëlushit u njoftuan se pas analizave, djali ishte infektuar me HIV. Kjo i shokoi dhe ata vendosën të ndjekin rrugët ligjore, pasi 1 vjeçari ishte shtruar në reanimacionin e Pediatrisë nga bronkopneumonia.
Për të sqaruar dyshimet e tyre, dy prindërit ju drejtuan laboratorëve në Gjermani dhe në Itali. Pas analizave, në të dy laboratorët e huaj ka dalë se prindërit e foshnjës 1 vjeçe nuk ishin bartës të HIV dhe për rrjedhojë fëmija nuk ishte infektuar prej tyre.
