Protesta e 11 shkurtit duket se do të jetë kauza e dytë që dop të bashkojë demokratët, pas sinjaleve që u dhanë me firmosjen e kërkesës për ngritjen e komisionit hetimor Rama-McGonigal dhe përplasjes së ashpër në Parlament me mazhorancën në aferën e korruptimit të ish-zyrtarit të FBI.
Të paktën këtë ka lënë të kuptohet deputeti demokrat Gazment Bardhi, i cili në “Opinion” ka konfirmuar se të gjithë deputetë demokratë do të jenë në shesh të shtunën në orën 12:00.
“E kam bërë publike, po do shkoj në protestë duke e mbështetur atë si një reagim qytetar ndaj një skandali që ka përfshirë kryeministrin dhe që ka tejkaluar zhvillimet brenda Shqipërisë. Vendimi është marrë i konsultuar me të gjithë kolegët. Të gjithë koleget e grupit parlamentar do marrin pjesë në protestë. Nuk kemi asnjë arsye për të qenë të ndarë në betejën me kundërshtarin”, tha Bardhi.
Sipas Bardhit, nuk ka asnjë arsye që dy grupet e PD të jenë të ndarë në betejën me kundërshtarin edhe pse ai nuk i mohon problemet e brendshme në selinë blu.
“Ne kemi një betejë të brendshme. Shkaqet që na ndajnë janë publike. Nuk ka një ndryshim qëndrimi në raport me ato çështje. Unë gjykoj se edhe sa i përket betejës së ardhshme elektorale duhet të gjenim një formë për tu unifikuar. Duhet vullnet i përbashkët”, theksoi deputeti demokrat.
