Kryetari i Partisë së Lirisë, Ilir Meta thotë se kryeministri Edi Rama është dorëzuar përballë kësaj opozita, e cila siç thekson ai sot ka fituar moralisht dhe nesër do të fitojë edhe numerikisht.
Meta u shpreh gjithashtu se opozita do të përshkallëzojë aksionin e saj opozitar, ndërsa theksoi se Rama dhe Rilindja kanë shkatërruar parlamentarizmit.
“Ai është dorëzuar përballë kësaj opozita. Sot opozita ka fituar moralisht, nesër do ta fitojë edhe numerikisht. Përshkallëzimi është që nga parlamenti ku opozita do të fuqizojë përpjekjet e saj për të rikthyer parlamentin. Në radhë të parë me iniciativat e saj. Rama ka shkatërruar parlamentarizmin me kukullat e tij. Opozita ka dorëzuar shumë projektligje në interes të qytetarëve këto janë bllokuar në mënyrë antikushtetuese dhe jashtë kushteve të rregullores së parlamentit”, tha Meta përballë Matilda Mcinit në RTSH 24.
I ndalur tek zgjedhjet e 14 majit, Meta u shpreh se qëllimi dhe objektivi i tij është arritja e një rezultati historik për Partinë e Lirisë.
“Vëmendja dhe përqendrimi im është tek 14 maji. Arritja e një rezultati historik për Partinë e Lirisë, natyrisht është një forcë që është krijuar mbi një trashëgimi të caktuar që ka qenë LSI, ky do të jetë një rezultat i jashtëzakonshëm. Objektivi im është maksimizimi i mandateve, sepse në fund të fundit demokracia është vendore. Unë besoj se PL i ka të gjitha mundësitë që të ketë në gjithë vendin këshilltarë të këtyre niveleve në mbrojtje të qytetarëve sidomos në kryeqendrat e vendit.
Pra është një shumicë e madhe e shqiptarëve që kërkon ndryshim. Është përgjegjësia jonë që të përmirësohemi më tej. Shqiptarët e kanë besimin tek opozita. Këto janë përpëlitjet e tij. Lojërat me vula, apo provokimi i 6 janarit. Opozita është në një rritje të pandërprerë dhe gjithë strategjia për të krijuar idenë që këtu s’ka opozitë dhe mire keq na mbeti Rama, kjo është bërë qesharake dhe absurde”, theksoi Meta.
