Trupat shqiptare të Forcave të Armatosura kanë shpëtuar nga rrënjojat një vajzë 5-vjeçare.
Forcat shqiptare kanë nxjerrë nga rrënojat 6 trupa të pajetë në zonën e Mallatjas, në Turqi.
73 forca nga skuadrat e kërkim-shpëtimit të Shqipërisë po vijojnë operacionet e kërkim-shpëtimit që prej ditë së martë në zonat e prekura nga tërmeti i 6 shkurtit. Në kushte tejet të vështira për shkak të rrënojave të ndërtesave të larta, por edhe motit me temperatura të ulëta, efektivët e Forcave të Armatosura po punojnë pa pushim për nxjerrjen e të mbijetuarve apo trupave të viktimave që humbën jetën nga tërmeti i së hënës.
Pjesëtarët e ekipit tonë shëndetësor kanë asistuar edhe në dhënien e ndihmës shëndetësore për dhjetëra persona të lënduar. Skuadrës së parë të kërkim-shpëtimit nga Shqipëria iu bashkuan sot edhe të tjera forca shtesë, për të mbështetur autoritetet turke në përballimin e pasojave të tërmetit të 6 shkurtit.
Të Hënën Turqia dhe Siria janë goditur nga një tërmet shkatërrues, ku si pasojë kanë humbur jetën mbi 11 mijë persona dhe mbi 50 mijë të tjerë kanë mbetur të plagosur.
Ekipet e shpëtimit po vazhdojnë me operacionet e kërkim-shpëtimit, të personave që kanë mbetur nën rrënojat e ndërtesave të shembura.
