Nis hetimi penal për një çift nga Durrësi, të cilit u shfaqën në një emision televiziv përmes një kamere të fshehtë, duke premtuar shitjen e foshnjës ende të palindur, te një person tjetër.
“Specialistët për Hetimin e Trafiqeve të Paligjshme, të DVP Durrës, arrestuan në flagrancë shtetasin E.N., 27 vjeç, banues në Durrës, si dhe referuan materialet në Prokurori, për shtetasen Xh.H., 25 vjeçe, për të cilën ka nisur procedimi penal në gjendje të lirë, njoftoi policia. Ata akuzohen për veprën penale ‘Trafikimi i të miturve’”, mbetur në tentativë.
“Mbrëmjen e djeshme, këta dy shtetas janë shfaqur në një video të transmetuar gjatë emisionit investigativ ‘Fiks Fare’, duke biseduar me një shtetas tjetër (i infiltruar nga stafi i këtij emisioni), për të shitur foshnjën që mbante në bark bashkëshortja shtatzënë (shtetasja Xh. H.), kundrejt shumës 5000 euro”, thuhet më tej në njoftimin e bluve.
