Në takimin e zhvilluar mbëmjen e sotme me të rinjtë e Forumit Rinor të PD, kreu i selisë blu, Sali Berisha ka rreshtuar të gjithë elementët që sipas tij ka përdorur qeveria e Edi Ramës për të vrarë shpresën te shqiptarët.
Sipas liderit të opozitës vendi është kthyer në një mallkim për qytetarët, pasi Rama nuk ka asnjë interes kombëtar apo social përveç vjedhjes përmes pushtetit.
“Kjo ndodh para së gjithash sepse Edi Rama, po vret me regjimin e tij shpresën tek shqiptarët. Ky vend nga Edi Rama dhe regjimi i tij është shndërruar në një tokë të mallkuar. Pasuritë e tij janë shndërruar në një mallkim për qytetarët shqiptarë. Fondet e buxhetit të tij, në një ndëshkim për qytetarët shqiptarë. E gjitha kjo, sepse ky grup kriminal që qeveris sot me në krye Edi Ramën, nuk ka asnjë interes tjetër, as kombëtar, as shoqëror, as social, përveç se interesit të pushtetit dhe pasurimit të tyre. Pikërisht për këtë arsye, këta vjedhin në 9 muaj 1.1 miliardë euro”, tha Berisha.
Por, ndër të tjera kreu i PD u ndal gjatë edhe te kryebashkiaku i Tiranës, Erion Veliaj duke e akuzuar si kryebashkiakun që nnë tre vite nuk ka guxuar të ballafaqohet me qytetarët pasi ka grabitur 54 milionë euro vetë me mbetjet në kryeqytet.
“Ai skandali që ka shpërthyer i Klosit është vetëm një simbol i asaj sa vjedhin këta. Do tu jap një shembull të freskët. Ju keni një person kryetar bashkie, i cili ka 3 vjet që nuk takon dot qytetarët, por i mbledh nëpër salla apo zyrat e bashkisë me përzgjedhje. Por ka 6 vite që vjedh për çdo ton mbetje që krijohet në qarkun e Tiranës, 18 euro fut në xhep duke ua marrë qytetarëve shqiptarë. I tarifon sikur digjen, nuk digjet asnjë kilogramë”, deklaroi Berisha.
Më tej lideri opozitar nënvizoi se Veliaj fut në xhep e më pas depoziton në banka offshore 18 euro që merr për çdo ton mbetje që depozitohet në Sharrë, duke ngritur taksat e pastrimit për çdo biznes e qytetar.
“Të gjitha depozitohen dhe ky u merr në kundërshtim me kontratën, 29 euro, 18 euro ky i vjedh, i çon ofshore, mundet dhe në Iran. Problemi është se baballarët tuaj, motrat dhe nënat tuaja që kanë një biznes të vogël, paguajnë trefish taksën e pastrimit. E kjo është vetëm njëra anë. Pra që të gjithë e shohin që fusha e Sharrës nuk ka djegës, nuk bëhet seleksionimi, por ai vazhdon nga studio në studio, në një kohë kur e ka vendin nga qelia në qeli, sikur nuk ndodh asgjë. Gjer tani janë bërë 54 milionë euro, minimumi të vjedhura vetëm aty. Qindra milion të vjedhura me djegësat, pasuri përrallore”, nënvizoi ai.
