Në takimin ku për herë të parë janë mbledhur të gjithë së bashku në selinë blu kandidatët e Partisë Demokratike e opozitës për zgjedhjet lokale të 14 majit, Sali Berisha është ndalur gjatë te afera McGonigal.
Pasi akuzoi Edi Ramën se “bën 137 udhëtime me charter, sikur të ishte sheiku më i pasur i Gjirit e përdor 200-300 milionë në vit vetëm për rrogat e pilotëve”, kreu i PD u shpreh se duke korruptuar zyrtarin e FBI, kryeministri i ka ngulur thikën pas shpine NATO-s dhe SHBA-ve.
“Kryeministri ynë shkon dhe blen njeriun më kryesor në agjencitë e zbulimit për sigurinë e SHBA-së. Ka krijuar një skandal jashtë imagjinatës. Ai ndrydhet në Surrel dhe përpiqet ta kalojë. Është e pakalueshme. Çdo ditë mediat e mëdha amerikane trajtojnë këtë akt të turpshëm. Këtë akt të papërgjegjshëm. Në fushën e sigurisë, i futi thikë pas shpine SHBA-së. Nëse ju fut thikë pas shpine SHBA-së, që janë përgjegjës për mbrojtjen e vendeve të lira, këtë akt e ke kryer ndaj NATO-s dhe ndaj vendeve të lira”, tha Berisha.
Për Berishën turp më të madh se skandali i korruptimit me qëllim lobingun për të shuar opozitën në Shqipëri i një zyrtari të intiligjencës amerikane, nuk mund të ketë për një kryetar qeverie.
“Këtë e bën kryeministri i Shqipërisë, një vend anëtar i NATO-s. Nuk e bën Lukashenko por Tirana e Edi Ramës. S’ka turp më të madhe se ky. Del dhe zvarritet si zvarranik nëpër media. Kur i thoshte mik me krenari dhe kërcënonte kundërshtarët e tij, duke i paralajmëruar në Kuvend se do shpalleshin non-grata. Këtë, ai e harron, por duhete të jemi realist”, nënvizoi lideri opozitar.
Ndër të tjera, Berisha beson se SHBA-ve i është bërë një dëm shumë i madh dhe ndaj mediat më të fuqishme si Neë York Times dhe CNN prej mëse një jave merren me dosjen e McGonigal duke zbërthyer në detaje lidhjen e tij miqësore me Ramën.
“Dëmi bëhet i jashtëzakonshëm, nëse miku i tij, McGonigal që u martua së fundmi me Edi Ramën, u ka dhënë të dhëna rusëve për sekretet agjenturore të SHBA-së. Do kishte kosto të shumta në jetë njerëzore. Sot CNN është marrë gjithë ditën me Edi Ramën. Si mundet kryeministri i një vendi mik të veprojë në këtë mënyrë. Si mund të trajtojë në këtë mënyrë, një prej njerëzve më të çmuar”, deklaroi ai.
