Kreu i Partisë së Lirisë Ilir Meta ka reaguar sot sërish për aferën Rama-McGonigal.
Pas publikimit të të tjera fakteve nga New York Times, Meta deklaroi se kryeministri Edi Rama e konsideron dhe trajton Shqipërinë si pronë private të tijën.
Meta tha më tej se “prokurorët amerikanë kanë parë gjithashtu se kryeministri i Shqipërisë i jep lejet e shpimet e puseve të naftës bazuar nga interesat private”. Gjithashtu Meta theksoi se Komisioni Hetimor do të ngrihet në mënyrë të padiskutueshme për të nxjerrë në dritë të vërtetën dhe implikimin e Ramës në këtë skandal që cënon sigurinë kombëtare me aleatët e SHBA-së.
“Komenti ynë është që Rama e konsideron dhe trajton Shqipërinë thjesht si një pronë private të tijën, duke e shitur, duke dhënë kontrata, detin, tokën ajrin dhe çdo gjë tjetër vetëm për interesa private pushteti dhe paraje. Deklaratat e tij të mbrëmshme skandaloze se ka lënë takim me një agjent të FBI-së thjesht rezultat i një sms-je dhe se për këtë takim nuk kishin pse të kishin dijeni ministria e Jashtme, ambasada jonë në SHBA, apo ambasada e tyre në vendin tonë, por sigurisht për takimin duhet të kishin dijeni persona privatë, bashkëpunëtorë të Ramës që janë përfshirë në këtë artikull si personi A dhe B, për veprimet bashkëpunuese me agjentin e FBI-së për interesa të Edi Ramës.
E thotë shumë qartë, prokurorët në Uashington. Kjo situatë e bënë më emergjente se asnjë herë tjetër ngritjen e komisionit parlamentar, i cili do të ngrihet patjetër. Edhe nëse kukullat e Ramës do vazhdojnë të insistojnë, do e ngrenë qytetarët atë komision. Ky është një skandal që pushtoi edhe ballinat e Ny Times”, deklaroi Meta.
