Një ngjarje e frikshme ka ndodhur në qytetin e Shkodrës.
Një mbikalim këmbësorësh është shembur ditën e sotme në rrethana të paqarta pasi nuk dihet nëse është goditur nga ndonjë kamion i lartë apo është rezultati i një pune pa cilësi siç ndodh shpesh në vendin tonë dhe infrastrukturën rrugore.
Fatmirësisht nuk ka të lënduar, ndërsa mbikalimi u rikonstruktua vetëm pak muaj më parë. Ndërkohë ka reaguar zyrtarisht edhe policia e cila bën me dije se ura është shembur për shkak se është goditur nga një kamion që transportonte vinça.
“Identifikohet, shoqërohet dhe procedohet penalisht, drejtuesi i kamionit, i cili duke transportuar një vinç, dyshohet se aksidentalisht goditi mbikalimin e këmbësorëve, në vendin e quajtur “Ura e Bahçallëkut”. Në vijim të informacionit paraprak për rrëzimin e mbikalimit të këmbësorëve, në vendin e quajtur “Ura e Bahçallëkut”, ju bëjmë me dije se gjatë veprimeve të kryera nga grupi hetimor ka rezultuar se shtetasi S. Sh., duke transportuar një vinç, me kamion, dyshohet se aksidentalisht vinçi ka goditur mbikalimin e këmbësorëve, në vendin e quajtur “Ura e Bahçallëkut”, duke e rrëzuar pjesërisht atë”, njofton policia.
Grupi hetimor, nën drejtimin e Prokurorisë, vijon veprimet e tjera procedurale për këtë rast. Në vendngjarje janë shërbimet e Policisë, shërbimet e zjarrfikëses dhe të Entit Pronar të Rrugës, të cilët po punojnë për hapjen e rrugës.
