Megjithëse iu fsheh opozitës e cila kërkoi interpelancë në Kuvend për skandalin e “McGonigal”, kryeministri Edi Rama ka reaguar për herë të parë pas kaosit të krijuar në seancën e sotme plenare ku deputetët demokratë kanë kërkuar që kreu i qeverisë shqiptare të japë “llogari” për implikimin e tij në aferën e lobimit kundër opozitës shqiptare.
Sipas Ramës, opozita po përpiqet që me shpifje të manipulojë opinionin publik me një çështje që sipas tij e ka hetuar drejtësia amerikane.
Pasi delegoi ministren Spiropali që të përballet me opozitën në interpelancë, Rama thekson se skenat në sallën e Kuvendit janë histeri vetëgjyqësie politike. Rama thotë se drejtësia e “nongratave” pretendon se zyrtari i lartë i FBI është korruptuar nga ai, por në të vërtetë sipas tij, drejtësia amerikane s’ka asnjë akuzë.
Reagimi i plotë i Edi Ramës:
“Një abuzim total me lirinë e fjalës,me të vërtetën,me publikun,në një dëshpërim total moral, politik, elektoral, ku me shpifje ekstreme synohet manipulimi i opinionit me një çështje të hetuar nga drejtësia amerikane që ka shkuar në gjykatë e që s’ka asnjë lloj lidhje me ne këtu!
Kush i ka dy fije mend e kupton se ç’është e tërë kjo histeri vetëgjyqësie politike e mediatike,mbi një gjyq në Amerikë për një zyrtar të FBI të cilin drejtësia e nongratave këtu pretendon se është korruptuar nga unë, ndërkohë që drejtësia amerikane s’ka asnjë akuzë a pretendim.
Kjo është një tallje e madhe dhe e shpifur e politikës pa din e as iman me ata që i shkojnë mbrapa kësaj politike figurash të diskredituara, të cilët duan të mbulojnë diellin me shoshë, ndërkohë që marrëdhëniet tona me SHBA dhe institucionet amerikane janë më të forta se kurrë”, shkruan Rama.
Tensione të forta dhe akuza të ashpra në drejtim të kryeministrit Edi Rama në lidhje me aferën McGonigal përbëjnë pasqyrën e seancës së sotme plenare në Kuvend. Kryeministri ka zgjedhur të “bojkotojë” punimet e Kuvendit duke deleguar te Elisa Spiropali kompetencat për t’u përballur me deputetët e grupit Alibeaj në interpelancën për skandalin me korruptimin e ish-zyrtarit të FBI me 225 mijë euro.
