Prokuroria e Posaçme Antikorrupsion ka kërkuar në gjykatë që i akuzuari për nxitje dhe përhapje të propagandës terroriste, Ibrahim El Salih (Lekica/Muxhahid) të dënohet me 4 vite e gjysmë burg sipas Nenit 232/a të Kodit Penal.
SPAK ka proceduar me gjykim të shkurtuar, ndërsa në përfundim të hetimeve organi i akuzës kishte konkluduar se postimet në rrjetin social Facebook të kryera nga 56-vjeçari shtynin lexuesit e tij për të përkrahur luftën e shenjtë të njohur si ‘Xhihadi.
“Nga ana e të pandehurit manifestohen thirrje/propagandë që të shtyjë personat lexues/ndjekësit e tij për të përkrahur luftën e shenjtë ‘xhihadin’, është solidarizuar me personat e vrarë në këtë luftë, me legjitimimin e krijimit të të ashtuquajturit shteti islam i Irakut dhe udhëheqësit e tyre, duke u solidarizuar me fitoren e luftëtarëve të shtetit islam të Irakut, ka mbështetur personat e burgosur të cilët kryejnë vepra penale dhe akte terroriste kundër disa shteteve perëndimore, ka përkrahur mobilizimin e fëmijëve në akte të dhunshme, si dhe ka synuar nxitjen dhe ka bërë thirrje publike për kryerjen e veprave penale me qëllime terroriste”, vlerëson SPAK për postimet e kryera nga Lekica në Facebook.
Organi i akuzës me kërkesën për dënimin e Lekicës që është firmosur nga prokurori Adnan Xholi, shprehet se i pandehuri duhet të gjykohet për nxitje, thirrje dhe propagandë për kryerjen e veprave me qëllime terroriste.
56-vjeçari me banim në Kukës është arrestuar në maj të vitit të kaluar pasi akuzohet se postonte me profile false në rrjetet sociale, foto dhe shkrime nxitëse, thirrje publike dhe propagandë për kryerjen e veprave terroriste kundër disa institucioneve të rëndësishme shtetërore.
“Nga hetimet e kryera prej disa muajsh nga Drejtoria e Antiterrorit në Policinë e Shtetit, në bashkëpunim me Byronë Kombëtare të Hetimit (BKH) dhe SPAK-un, duke përdorur metodat proaktive, u bë i mundur identifikimi i personit që përdorte këto profile false, Ibrahim El Salih(Lekica), person me prirje ekstremiste fetare, i cili postonte në rrjetet sociale, shkrime të ndryshme në përkrahje të ISIS. Gjithashtu, i bënte thirrje qytetarëve, për përkrahje të luftës në Siri”, thuhej asokohe në njoftimin e policisë.
