Prej disa ditësh vijon aksioni i policisë për të çmontuar kamerat “spiune” të montuara nga grupet kriminale për të pasur kontroll të plotë jo vetëm për lëvizjen e policisë por edhe qytetarëve të cilëve u është shkelur privatësia.
Gjatë 24 orëve të fundit, uniformat blu në disa qarqe të vendit kanë çmontuar dhe sekuestruar dhjetra kamera sigurie që ishin vendosur në kundërshtim me ligjin.
Kujtojmë që ditën e djeshme ministri i Brendshëm Blendi Çuçi e justifikoi dështimin e policisë duke deklaruar se “krimi i organizuar” ishte kamufluar si biznes për të montuar kamera jo vetëm në objekte të caktuara por edhe shtyllat elektrike, semaforët apo ndriçuesit e rrugëve që prej kohësh ishin kthyer në funksionon të bandave kriminale.
Policia e Shtetit thotë se:
-Në qarkun Shkodër, në vijim të fazës së dytë, Policia ka çmontuar 20 kamera të vendosura në kundërshtim me ligjin. Deri tani, në këtë qark janë sekuestruar në total 79 kamera.
-Në qarkun Lezhë, gjatë fazës së njëmbëdhjetë të planit operacional policor të koduar “Fijet”, Policia ka çmontuar dhe sekuestruar 9 kamera të vendosura në kundërshtim me ligjin, në Mirditë dhe në Zejmen, Lezhë. Për 4 kamerat e instaluara në Zejmen, Lezhë, është inicuar hetimi për 1 shtetase.
-Në qarkun Dibër, në vijim të fazës së shtatë të këtij plani operacional, në qytetin e Peshkopisë, Policia ka çmontuar dhe sekuestruar 5 kamera. Në hetim për ndërhyrje të padrejta në jetën private, 3 shtetas. Deri tani, në këtë qark, janë çmontuar dhe sekuestruar në total 6 kamera dhe janë iniciuar hetime të thelluara për 4 shtetas.