Nuk ka zgjatur më shumë se 10 minuta qetësia në sallën e Kuvendit pas rikthimit nga ndërprerja e parë që urdhëroi kryetarja e Kuvendit, Lindita Nikolla.
Gazment Bardhi duke folur në emër të deputetëve të tjerë të grupit Alibeaj ka refuzuar sërish që të zhvillojë interpelancë me ministren Elisa Spiropali, pasi kërkesa e tyre ka qenë për të thirru kryeministrin Edi Rama në lidhje me aferën McGonigal.
Në një kohë që deputetët e PD mbajtën të rrethuar foltoren e Kuvendit, Bardhi tha se “kryeministri po fshihet pas fustanit të ministres për aferën e tij personale”, që ka cënuar raportet e Shqipërisë me SHBA-të.
“Zoti Bardhi ju bëj thirrje për të vijuar me interpelacën, është procedurë e konsoliduar dhe kryeministri ka të drejtë të delegojë për këtë procedurë ministres së Shtetit për Parlamentin. Ju bëj thirrje të vijojmë me interpelancën”, tha kryeparlamentarja Nikolla, por Bardhi u përgjigj duke thënë: “Unë s’kam kërkuar interpelancë me Elisa Spiropalin, por me kryeministrin”.
“Nuk është kapur në vendimin e drejtësisë amerikane Spiropali duke korruptuar një zyrtar të lartë të FBI por Rama është kapur në flagrancë duke korruptuar një zyrtar të lartë të FBI. Po bëj interpelancë për një veprimtari private të kryeministrit të kryer në restorante bare e parkingje restorantesh. Dëgjova këtu ministren Spiropali dhe tha pse keni frikë ta zhvilloni me mua interpelancën. Problemi është pse ka frikë Rama të vijë në Parlament, pse për një veprimtari kriminale të kryer nga Rama tenton të keqpërdor një zonjë, të fshihet pas fustanit të saj? Të vijë këtu të japë llogari e shpjegime. Kjo nuk është çështje qeveritare por aferë personale e Ramës”, shtoi deputeti demokrat.
Ndërkohë, sërish nga vendi u përgjigj Spiropali, duke pyetur me ironi Bardhin se “përse ka frikë nga gratë”.
Ministrja u shpreh nuk ka rëndësi nëse vishet me fustan apo pantallona, por e rëndësishme është që në parlament të thuhen të vërtetat.
“Qetësohuni more, kam gjithë durimin që t’ju dëgjoj. Nuk ka rëndësi a vishem me fustan apo pantallona. E rëndësishme është që këtu të vijmë dhe të flasim të vërteta. Nuk mund të lejojmë që ju të ngrini gënjeshtra dhe të pretendoni që ne të mos ju japin përgjigje. Po ju pyes i doni apo nuk i doni përgjigjet? Zoti Bardhi këtë mund ta pres nga ata që kanë mbetur jashtë, nuk e pres këtë nga ju. Nuk mund të vini këtu të hidhni akuza që nuk ekzistojnë në asnjë dosje, por si duket me ata që rri ashtu bëhesh. 26 shpirtra e prisnin Berisha junior në derën e SPAK ndaj u bllokua kjo foltore. përgjigjen e keni marrë dhe do ta merrni”, tha ajo.
Sakaq pas përplasjes Bardhi-Spiropali, kryeparlamentarja ka kërkuar të lirohet foltorja duke i tërhequr vëmendje deputetes Vokshi.
“Ju lutem të lironi foltoren. Nëse kërkoni respekt për të folur duhet të jepni respekt ndaj meje. Ju bëj thirrje përsëri të lironi foltoren. I tërheq vëmendje Znj. Vokshi, ju lutem të lironi foltoren”, tha Nikolla.
Më pas Nikolla ndërpreu seancën dhe tha se do të ketë 5 minuta pushim.