Anëtari i kryesisë së PD, Indrit Hoxha deklaroi se kryeministri Edi Rama është drejt largimit pas skandalit dhe implikimit të tij në aferën korruptive me ish zyrtarin e FBI “McGonigal”, tashmë i arrestuar në SHBA.
Gjatë intervistës për Panorama TV, Indrit Hoxha e shpreh se PD është e vetmja që ka sjellë ndryshimin në Shqipëri dhe duhet të jetë alternativë qeverisëse.
“Rama e ka marrë rrugën për tu larguar dhe kjo jo për shkak të meritës së opozitës po për shkak të korrupsionit që ai ka ndërtuar. Të arrish të korruptosh zyrtarë shumë të lartë të Amerikës është një fakt shumë i rëndë. Këtu del një pastruese dhe gjen 500 mijë euro dhe askush nuk del të thotë të kujt janë këto para deri këtu ka arritur korrupsioni. Sot ka ish ministra prapa hekurave është i akuzuare Edi Rama. Ne e kemi lulëzuar Shqipërinë, nëse ka një parti që ka sjellë zhvillim është PD.
Ne nuk jemi PS që vret e pret për ata që kërkojnë demokracinë. PD solli ndryshimet në Shqipëri nuk e djegim vendin por duam që njerëzit të mos largohen. Këtu i vendoset tritol pronës publike sikur është një mall pa zot dhe pa dokumentacion. Këtu biznesi duhet të jetë i sigurt dhe qytetarët të kenë shpresë për jetën e tyre prandaj PD duhet të jetë një alternativë shumë e mirë qeverisëse”, tha fillimisht Hoxha.
Gjithashtu, si kandidat i PD për Vorën, Hoxha u shpreh i bindur se partia që përfaqëson do të dalë fituese më 14 maj, ndërsa akuzoi kryeministrin Rama se e ka falimentuar këtë bashki.
Hoxha u shpreh se tubimi i 11 shkurtit do të nisë në orën 12:00 dhe siç tha ai, “ka marrë fund koha e fjalimeve në protesta”. Indrit Hoxha theksoi se do të jetë një rrugë pa kthim, duke siguruar se edhe qytetarët do të rezistojnë deri në fund.
“Edi Rama do largohet me çdolloj mjete dhe mënyrë demokratike. Protesta është një nga mjetet demokratike që ta mundëson këtë. Synimi është largimi i Ramës dhe vajtja drejt zgjedhjeve të parakohshme. Protesta do të jetë e pandalshme. DI të them që kjo është një protestë që pa ikur Rama nuk ndalon. Duhet të heqim Ramën, të përgatiten kushtet për zgjedhje të parakohshme”, tha Hoxha.
