Analisti Andi Bushati u përplas me deputetin Gazment Bardhi në emisionin Now në Euronews Albania, teksa i cilësoi deputetët demokratë të grupimit Alibeaj, ku bën pjesë edhe Bardhi, si njerëz pa identitet politik.
Sipas Bushati, këta deputetë, që kanë ardhur në Kuvend në sajë të një elektorati që i ka votuar, nuk kanë qenë në gjendje të shpjegojnë individualisht asnjë nga votat e tyre lidhur me vendit që kanë marrë.
“Deputetë budallenj e sharlatanë”
“Ka një grup që mbështet Alibeajn, që janë qenie amorfe dhe nuk dinë të thonë se pse e kanë marrë këtë vendim, pse votojnë vetingun dhe kjo është rezultat i diçkaje që ka ndodhur në PD duke futur njerëz anonimë pa sens politik por edhe një sëmundje që po përhapet. Ka humbur sensi i protagonizmit dhe identiteti politike, grupi ku është rreshtuar Bardhi ka shumë të tillë”, tha Bushati.
Kjo deklaratë është kundërshtar nga Bardhi, që i ka cilësuar deputetët e PD të rreshtuar në të njëjtin grup me të si njerëzit me më shumë integritet politik.
“Qëndrimin tonë me debatin brenda PD e kemi dhënë prej 1 viti, sa kohë nuk ka asnjë ndryshim ne kemi zgjedhur formën tonë për të mos ushqyer vijimin e luftës së brendshme në PD. Kemi gjykuar se është më mirë të bëjmë betejën tonë në parlament. Kolegët në një grupim me mua janë njerëzit më me integritet politik, ndryshe do ishin pozicionuar siç kanë bërë disa që i thoshin Berishës vrarës e më pas shkuan pas tij”, tha Bardhi.
Sipas analistit Andi Bushati ka disa deputetë në Partinë Demokratike që ende nuk iu dihet emri.
Ai debatoi me Bardhin, i cili i drejtoi pyetjen se përse nga Bushati nuk ka sulme për deputetët e Berishës, por veç për ta.
“Mi thoni ju emrat e atyre që janë rreshtuar me zotin Berisha apo atje flet vetëm zoti Berisha e s’ka nevojë ça ka poshtë? Pse s’i quan ata ti budallenj të dobishëm, të shitur, të blerë, pa identitet e me radhë? Pse nuk i quani të tillë?” – u shpreh Bardhi.
