Kreu i Grupit Parlamentar të PS, Taulant Balla ka folur për përjashtimin e 5 deputetëve të Partisë Demokratike nga Kuvendi pas tensioneve në seancën e javës së kaluar.
Dita e enjte ishte një arenë e fortë përplasjesh mes opozitës dhe mazhorancës pasi deputetët e PD-së kërkuan me ngulm prezencën e kryeministrit Edi Rama për të dhënë “llogari” lidhur me përfshirjen në skandalin e korruptimit të zyrtarit të FBI, Charles McGanigal, i arrestuar për korrupsion 1 javë më parë.
Nga ambientet e Kryesisë, Balla tha se askush nuk mund të marrë “peng” Kuvendin dhe sipas tij përjashtimi i deputetëve është bërë në bazë të rregullores.
“As një lloj kërkese e kësaj forme nuk miratohet dhe as nuk mund të merret në konsideratë. Do mundohemi që diskutimet të zhvillohen. Deputetët që thyen rregullat të mos marrin pjesë në seancat plenare. Shpresoj që nga 2 shkurti Kuvendi t’i rikthehet normalitetit. Situata që u krijua është qesharake. Ajo që ka rëndësi është që kush mendon dhe pretendon se do të marrë peng Kuvendit e ka shumë gabim. Kuvendi do të vazhdojë punën e vet”- tha Balla.
Gjithashtu Berisha prej disa ditësh artikulon një numër të lartë akuzash drejtuar kryeministri Edi Rama i cili pas skandalit “McGanigal” është zhdukur duke mos lënë asnjë gjurmë. Berisha hodhi hipotezën e largimit të Ramës jashtë vendit për të kërkuar ndihmë te George Soros, ndërsa ka ripërsëritur kërkesën e tij në drejtim Ramës për të dhënë dorëheqjen pasi ka paguar për të asgjësuar opozitën shqiptare.
Gjithashtu mediat ndërkombëtare bëjnë me dije se ish-zyrtari i lartë i FBI-së McGonigal ka marrë pagesë 225 mijë dollarë nga një ish-spiun shqiptar dhe ka zhvilluar takime sekrete me kryeministrin shqiptar, Edi Rama.
