Seanca plenare e Kuvendit u kthye në një demonstrim të dominimit numerik të mazhorancës, ku kryetari Niko Peleshi zgjodhi të mbyllë çdo hapësirë për debat parlamentar, duke kaluar direkt në votim.
Pas tensioneve të mëparshme në sallë dhe përjashtimit të deputetit Gazment Bardhi, i cili refuzoi të largohej, Peleshi vendosi të rinisë seancën duke anashkaluar diskutimet dhe duke kaluar menjëherë në procedurën e votimit. Kërkesa për këtë veprim erdhi nga kreu i grupit parlamentar të PS, duke e kthyer Kuvendin në një makineri votimi pa zë kundërshtues.
Me 73 vota të mazhorancës, u miratua projektligji për menaxhimin e mbetjeve , një nismë që ka ngjallur debat publik për mungesën e transparencës dhe përfshirjes së komuniteteve lokale.
Gjatë votimit, tensionet nuk munguan. Deputeti Bardhi vijoi të ndërhynte pas çdo leximi të Peleshit, i cili reagoi me një taktikë të pazakontë: pas çdo fjale “Miratohet”, i drejtohej Bardhit me “Dil jashtë!”, duke e kthyer sallën në një skenë përjashtimi dhe jo përfaqësimi.
Ndërkohë në fund të seancës së sotme plenare, mazhoranca votoi kundër propozimit të Partisë Demokratike, lidhur me mocionin me debat për rezolutën e gjenocidit serb në Kosovë.
Socialistët hodhën poshtë kërkesën e opozitës, gjë që solli irritimin e këtyre të fundit gjatë votimit.
Mazhoranca votoi me 70 vota kundër.
