Prej të hënës mbrëma afera “McGonigal” ka tronditur politikën shqiptare në themel, me opozitën që ka kërkuar dorëheqjen e kryeministrit Edi Rama pasi emri i tij del në aktakuzën e drejtësisë amerikane për lidhje me ish-zyrtarin e korruptuar të FBI-së, Charles McGonigal.
Shefi i qeverisë prej shpërthimit të skandalit ka bërë vetëm një dalje publike ku ndryshe nga pak muaj më parë e ka mohuar McGonigal si mikun e tij dhe është mbrojtur duke thënë se nuk ka lidhje me hetimet që po zhvillohen në SHBA.
Rama gjithashtu ka përdorur dy herë rrjetet sociale për të mohuar lidhjen e tij me zyrtarin e arrestuar, ndërsa është shprehur gjithashtu se pagesa prej 225 mijë euro që ish-agjenti i SHIK Agron Neza ka bërë ndaj McGanigal në Nju Xhersi është një borxh mes njëri-tjetrin, edhe pse erdhi vetëm pak kohë pas takimit të kryeministrit me të në Tiranë.
Fakt është që Rama ka zhvilluar të paktën katër takime me McGanigal nga 2017 në 2018, dy në Tiranë dhe dy në Uashington, ndërsa detaje nga dosja që përfshijnë në lojë edhe oligarkun rus Oleg Deripaska duken të jenë vetëm maja e ajsbergut.
Por, ajo çka bie në sy pas shpërthimit të skandalit është heshtja që ka rënë në rrugën e Elbasanit, aty ku nga selia diplomatike e SHBA-ve në Tiranë, Yuri Kim nuk lë postim pa bërë në Twitter e deklaratë në media kur bëhet fjalë për ndikimin rus në Shqipëri.
Ambasadorja amerikane çuditërisht ka heshtur prej 4 ditësh duke mos komentuar skandalin që ka përfshirë mediat e huaja, ku theksohet se ish-zyrtari i lartë i FBI është korruptuar nga qeveria shqiptare pë të shtyrë përpara në institucionet e SHBA një hetim për lobimin e opozitës.
Edhe sot pas një ndalese prej 45 minutash në Gjykatën Kushtetuese, që erdhi para zgjedhjes së kreut të këtij organi të drejtësisë dhe dy ditë pas betimit të gjyqtares Holta Zaçaj si anëtarja e 9, Yuri Kim “e kyçi” gojën para mediave.
Ajo ka reaguar vetëm pas takimit me një postim të thatë në Twitter, ku shprehet se tashmë që nga dhjetori i 2022, Kushtetuesja është e kompletuar me 9 gjyqtarë, ndërsa i ka uruar suksese në rrugën drejt drejtësisë.
“Që nga dhjetori 2022, KT Kushtetuese është kompletuar me 9 gjyqtarë. Arritje e madhe për reformën në drejtësi, e cila mbështetet fuqishëm nga . Një nder të takoj të gjithë gjyqtarët sot për të uruar sukses në zgjedhjen e një shefi të ri dhe në dhënien e drejtësisë me pavarësi dhe integritet, në përputhje me ligjin”, shkruan ambasadorja Kim.
