Kreu i Partisë Demokratike, Sali Berisha ka hedhur akuza të forta ndaj kryeministrit Edi Rama për të cilin tha se është përfshirë nga një mega aferë për të “asgjësuar” opozitën shqiptare.
Duke iu referuar arrestimit të mikut të Edi Ramës në SHBA, pikërisht agjentit të FBI-së, Charles McGonigal, Berisha theksoi se kryeministri shqiptar duke u përfshirë në këtë aferë ka cënuar sigurinë e Amerikës, NATO-s dhe botës së lirë.
Gjithashtu Berisha theksoi se Rama ka përdorur “agjentin si vrasës me pagesë për të trilluar kundër opozitës shqiptare”, kjo sipas tij përbën një krim ndërkombëtar.
Berisha: “Sot parlamenti ka ditën e turpit, ditën e fundit. Parlamenti refuzoi kërkesën më legjitime të një grupi deputetësh për të zhvilluar një debat me urgjencë, për çështjen që ka goditur gjer në palcë vendet e lira. Imagjinoni se në cfarë afere është implikuar Shqipëria. Imagjinoni se si kryeministri ka vënë në rrezik sigurinë e SHBA, NATO dhe botës së lirë. Imagjinoni një vrasës me pagesë që merr para nga kryeministri për të vrarë opozitën shqiptare. Ne këtë nuk e kalojmë, Rama është sot njeriu me i inkriminuar në Europë dhe më gjerë. Unë kam bindjen se drejtësia amerikane do të thotë fjalën e saj ndaj këtij krimineli, para saj duhet të flasin shqiptarët. Rama me dy bashkëpuntorë ka paguar shefin e FBI, njërin për të ndjekur të gjitha rrjetet e spiunazhit në SHBA. Rama ka përdorur agjentin si vrasës me pagesë për të trilluar kundër opozitës shqiptare, kjo përbën një mega-krim, krim ndërkombëtar, do kërkojmë që t’i japin dënimin më të rëndë”
Arrestimi i ish-zyrtarit të FBI-së, Charles McGonigal ishte një kal beteje për opozitën sot në Kuvend, ku me insistim u kërkuar që të ishte i pranishëm për të dhënë llogari kryeministri Edi Rama, i cili dyshohet se ka paguar “mikun e tij” amerikan për lobingje dhe sulme ndaj Partisë Demokratike.
Teksa i kërkoi kryetares së Kuvendit Lindita Nikolla që të thërrasë kryeministrin për t’i shpjeguar shqiptarëve përfshirjen në skandalin që po hetohet në Nju Jork, Enkelejd Alibeaj jashtë sallës së Parlamentit kërkoi që Prokuroria e Posaçme Anti-korrupsion të tërheqë dosjen nga SHBA.
