Një aksident i rëndë u shënua mbrëmjen e djeshme në Elbasan ku një makinë ka përplasur 20-vjeçarin, Fiori Sula i cili ka gjetur vdekjen e menjëhershme.
Për këtë lajm të trishtë ka reaguar edhe deputeti i PD Luciano Boçi, i cili i shpreh ngushëllime familjes së 20-vjeçarit teksa shkruan se Fiori ishte një prej të rinjve më kurajozë në kryesinë e Forumit Rinor të Partisë Demokratike.
“Trishtim dhe dhimbje pa fund për Fiorin! Një i ri energjik dhe plot ëndrra u largua në mënyrë tragjike nga kjo jetë! Jam pa fjalë për dhimbjen dhe mungesën e pazëvendësueshme që ky largim i tillë sjellë për familjen Sula! Fiori ishte një prej të rinjve më kurajozë në kryesinë e Forumit Rinor të Partisë Demokratike! Lutem që shpirti i tij të prehet në paqe dhe zoti i dhëntë forcë familjes Sula” shkruan Boçi në postimin e tij.
Mësohet se shoferi është larguar menjëherë nga vendngjarja pas aksidentit ndërsa policia po punon për gjetjen e tij dhe zbardhjen e plotë të rrethanave.
Njoftimi i policisë:
Më datë 23.01.2023, rreth orës 21:25, në unazën e qytetit, një automjet ende i paidentifikuar, ka aksidentuar, këmbësorin shtetasin F. S., rreth 20 vjeç, dhe është larguar nga vendi i aksidentit. Si pasojë shtetasi F. S., ka ndërruar jetë rrugës për në spital. Grupi hetimor ndodhet në vendngjarje dhe po punon për zbardhjen e rrethanave të aksidentit, identifikimin dhe kapjen e drejtuesit të automjetit.
