Mesi i janarit ka sjellë në Shqipëri dimrin e vërtetë me reshje të dendura shiu e dëborë dhe temperatura të ulëta në pjesën më të madhe të territorit.
Teksa zona si Shkodra e Lezha kanë vuajtur problematikat e krijuara si pasojë e reshjeve të shiut, qarku i Korçës është prekur nga reshjet e dëborës.
Në zonën turistike të Dardhës trashësia e dëborës ka shkuar deri në 10 centimetër, por akset rrugore mbeten të hapura.
Situata në Korçë:
Në Qarkun Korçë gjatë natës ka patur reshje shiu/dëbore me intensitet deri mesatar.
Reshjet kanë qenë në formë dëbore në kuotën +1300 m. Si pasojë në rrugën e Dardhës, në kilometrat 9-12, trashësia e borës ka arritur deri në 10 centimetër, por është punuar për pastrimin dhe kriposjen e këtij aksi..
Kushtëzuar nga sasia e reshjeve dhe temperaturat u punua nga kontraktorët në kontroll të akseve rrugore. Në akset rrugore nacionale dhe turistike qarkullimi i mjeteve bëhet pa probleme, por rekomandohet përdorimi i gomave dimërore.
Kontraktorët janë në gatishmëri për mirëmbajtje dimërore nisur edhe nga parashikimet e motit me reshje shiu/dëbore, në orët në vijim.
Sakaq në aksin rrugor Shtyllë-Panarit vijon ende puna për të bërë të mundur kalimin e mjeteve, pasi kjo rrugë u bllokua duke lënë fshatra të izoluar. Në disa vende në këtë zonë trashësia e borës shkon deri në dy metër.
Ndërkohë gjatë natës ka pasur ndërprerje të energjisë elektrike në Leskovik.
