Ka dështuar sërish përballja e të penduarit të drejtësisë Luftar Reçit me Emiljano Shullazin në Gjykatën e Posaçme Kundër Korrupsionit dhe Krimit të Organizuar.
Mësohet se shkak është bërë mungesa e gjyqtares së çështjes Etleva Dedës, e cila prej disa kohësh ndodhet në spital pas problemeve shëndetësore.
Seanca e radhës është caktuar të mbahet më 27 janar në orën 08:30.
Apeli i Posaçëm konfirmoi më 3 dhjetor 2021 dënimin me 14 vite burg për Shullazin, i fajësuar për “gjobëvënie” ndaj biznesmenëve Ylvi Beqja dhe Jani Zaka, si edhe për akuzën e “grupit të strukturuar kriminal”.
Shullazi akuzohet nga SPAK edhe për pjesëmarrjen në vrasjen e biznesmenit Vajdin Lame, por edhe Klodian Saliut i cilësuar si ish-rivali i Lulzim Berishës.
Me statusin e bashkëpunëtorit të drejtësisë, Reçi, si i përfshirë në të dyja ngjarjet, zbardhi dinamikën e vrasjeve që tronditën vendin në vitin 2005, si dhe përfshirjen në të të ish-kreut të Bandës së Durrësit, Lulzim Berisha, dhe kunatit të tij Plarent Dervishaj, të cilët janë shpallur në kërkim.
Dy ngjarjet kriminale të zbardhura nga SPAK kanë ndodhur në shkurtin e vitit 2005.
Mbrëmjen e 26 shkurtit, Klodian Saliu po udhëtonte në një automjet tip “Mercedes” në aksin Durrës-Maminas, kur nga një automjet në lëvizje u qëllua me breshëri automatiku. Saliu mbeti i vrarë, ndërsa u plagos edhe një person tjetër.
24 orë me vonë, biznesmeni Vajdin Lamaj u vra nga një shpërthimi telekomanduar i një sasie tritoli të vendosur në ashensorin e pallatit të tij pranë stadiumit kombëtar, të quajtur asokohe “Qemal Stafa”.
Përveç tij, i vrarë mbeti edhe Artan Arsi.
