Prokuroria e Posaçme kundër Korrupsionit dhe Krimit të Organizuar bëri të ditur se ka zbuluar disa të dyshuar që kanë ndihmuar dy atentatorët që po gjykohen për një atentat mafioz të profilit të lartë në Durrës në vitin 2019, duke arrestuar pesë prej tyre dhe duke shpallur në kërkim dy të tjerë.
Operacioni lidhet me ngjarjen e 1 nëntorit 2019, kur në autostradën Tiranë – Durrës, atentatorët shënjestruan një makinë në të cilën udhëtonin Pëllumb Muharremi, i cili njihet edhe si Aleksandër Laho, si dhe ish-prokurori Arjan Ndoja, duke zbrazur një breshëri plumbash që lanë të vdekur një 30-vjeçar që punonte si shofer dhe dy të tjerët të plagosur.
Prokuroria ka ngritur akuzë ndaj Redjan Rrajës dhe Ariol Halilajt si të dyshuar për atentatin, ndërsa të premten njoftoi se hetimet shtesë kanë sjellë “identifikimin e autorëve të tjerë që kanë marrë pjesë në këtë ngjarje”. Tre vetë, të cilëve prokuroria i referohet me inicialet P. D., J. M. dhe A. SH, dyshohen si pjesëmarrës në atentat si dhe R. RR., i cili dyshohet se ka ndihmuar të pandehurit në atentat.
Policia nuk ishte në gjendje të gjente P.D., dhe R. Rr.. Të dy besohet se janë jashtë Shqipërisë.
Inicialet P.D., i referohen shtetasit Plaurent Dervishaj, i cili është shpallur në kërkim në lidhje me ngjarje të tjera dhe që duket se jeton jashtë Shqipërisë, ndërsa inicialet R.Rr., i referohen Ramazan Rrajës, një tjetër nip i deputetit socialist Rrahman Rraja. Ky i fundit u bë i njohur për publikun në vitin 2018, kur një ish-oficer policie, i cili ka kërkuar strehim politik në Zvicër, e denoncoi si personi që e detyroi të mos pranojë një kallëzim për dhunë kundër djalit të tij Rexhep Rraja.
Rrahman Rraja ka deklaruar më herët se nuk ka lidhje të drejtpërdrejtë me nipërit e tij. Ai u rizgjodh deputet në listën e Partisë Socialiste në zgjedhjet e vitit të kaluar ku u përcaktua nga partia në vend të gjashtë në listën shumëemërore./BIRN
