Ka nisur në Gjykatën Kushtetuesi procesi për paditë e firmosur nga deputetet e PD, që kërkojnë heqjen e mandatit të deputetit për ministren Olta Xhaçka.
Fillimisht, po shqyrtohet kërkesa e “grupit Alibeaj”, që ashtu si padia tjetër e depozituar nga PD (që sipas kalendarit të gjykatës nis shqyrtimin në 13:00, po sot), kërkon heqjen e mandatit të Xhaçkës, për shkak të shkeljes së ligjit për parandalimin e konfliktit të interesit.
Bashkëshorti i saj Artan Gaçi ka përfituar të drejta pasurore mbi pasuri shtetërore – një kompani e Gaçit ka fituar statusin e investitorit strategjik dhe të drejtën e shfrytëzimit të një sipërfaqe plazhi në bregdetin e jugut – dhe në këtë formë përfitimet e Gaçit konsiderohen si përfitime dhe të vetë ministres.
Kështu, sipas opozitës, Xhaçka është në konflikt interesi dhe duhet të shkarkohet si deputete e Kuvendit.
Kryetari i PD-së, Sali Berisha paralajmëroi një ditë më parë se ka një mobilizim nga mazhoranca për ndikime mbi gjyqtarët e Gjykatës Kushtetuese, për të vendosur në favor të Xhaçkës.
Xhaçka nga ana tjetër, e cila ka mohuar akuzat e opozitës, planifikon të mbrohet me procedurë. Avokati i ministres së Jashtme pretendon se kërkesa për papajtueshmërinë e mandatit është dorëzuar përtej afateve ligjore – ndërsa argumenton se ligji nuk rregullon përgjegjësinë e deputetit për sjelljen e familjarëve të tij.
Tashmë me nëntë anëtarë, Gjykata Kushtetuese do të duhet të vendosë me pesë vota vendimtare për mandatin e ministres.
