Një ditë para seancës në Gjykatën Kushtetuese, ku do të diskutohet mandati i deputetit të Olta Xhaçkës, opozita paralajmëron se po ushtrohet ndikim për një vendim në favor të ministres së Jashtme.
Më 18 Nëntor, si PD ashtu dhe “grupi Alibeaj” iu drejtuan Kushtetueses me dy kërkesa, që në thelb kërkonin heqjen e mandatit të Xhaçkës, për shkak të shkeljes së ligjit për parandalimin e konfliktit të interesit. Bashkëshorti i saj Artan Gaçi ka përfituar të drejta pasurore mbi pasuri shtetërore – një kompani e Gaçit ka fituar statusin e investitorit strategjik dhe të drejtën e shfrytëzimit të një sipërfaqe plazhi në bregdetin e jugut – dhe në këtë formë përfitimet e Gaçit konsiderohen si përfitime dhe të vetë ministres. Kështu, sipas opozitës, Xhaçka është në konflikt interesi dhe duhet të shkarkohet si deputete e Kuvendit.
Berisha: Mobilizim për të mbrojtur Olta Xhaçkën
Seanca në Kushtetuese për kërkesat do të zhvillohet të Martën, ndërkohë kryetari i PD-së Sali Berisha ngre alarmin se ka një mobilizim nga mazhoranca për ndikime mbi gjyqtarët e Gjykatës Kushtetuese, për të vendosur në favor të Xhaçkës.
“Ky grup i strukturuar ka ndërmarrë dhe po ndërmerr forma antiligjore, antikushtetuese presioni ndaj anëtarëve të Gjykatës Kushtetuese me qëllim që të përligjin grabitjen përmes firmës së Edi Ramës nga Olta Xhaçka dhe bashkëshorti i saj, të statusit të investitorit strategjik me së paku 5 milionë euro favore”, theksoi këtë të Hënë nga selia blu, kreu i PD-së Sali Berisha.
“Kushtetuta e Shqipërisë ka qindra nene, por njëri nga këto nene, do ta quaja si nenin e artë, ai është neni që nuk lejon në mënyrë kategorike deputetët dhe ministrat, të pasurohen nga pasuritë publike gjatë periudhës që ushtrojnë detyrat apo burime të tjera përveç rrogës. Ky nen është shkelur në mënyrën më flagrante, kur ministrja Xhaçka siguron për burrin e saj strategjik, statusin e investitorit strategjik. Xhaçka kryen vepra të rënda penale, implikon kunatën e saj amerikane, me banim në Boston, si bashkëpronare në këtë aferë të tmerrshme korruptive”, shtoi ai.
Apeli për trupën gjykuese
Berisha i bëri apel anëtarëve të Gjykatës Kushtetuese të vendosin me paanësi.
“Unë jam këtu para jush për t’u bërë thirrje gjykatësve, të gjykojnë nesër me paanësi, bazuar në ndërgjegjen e tyre, mbi interesin kombëtar dhe Kushtetutën e vendit. Gjykimi i nesërm është një provë e fuqishme e triumfit të Kushtetutës”, deklaroi Berisha.
Olta Xhaçka nga ana tjetër ka mohuar akuzat e opozitës. Ajo ka pretenduar se nuk është në konflikt interesi.
Lexo edhe:
Mandati i Xhaçkës rrezikon “mbytjen” në Himarë. Rama kamufloi skandalin
