Deputeti i Partisë Demokratike Oerd Bylykbashi tha në një intervistë televizive se PD do të hyjë në zgjedhjet e 14 Majit vetëm për të fituar.
I pyetur se a e ka thelluar përçarjen brenda PD-së vendimi i Alibeajt për përjashtimin e 4 deputetëve, Bylykbashi e quajti një akt të kotë që nuk ndikon aspak në objektivin e demokratëve.
“Objektivi ynë është rrëzimi i Edi Ramës. Ne hyjmë në zgjedhje për të fituar dhe jo për të krijuar aleanca”-theksoi Bylykbashi për “Klan News”.
Oerd Bylykbashi: Ne do të bëjmë të gjitha përpjekjet për të konverguar maksimumin e forcave të Partisë Demokratike. Mund të ketë veprime specifike të deputetëve që pa dëshirën e vullnetin e Edi Ramës, veprimi i tyre do kishte vlerë nul, qoftë padia në gjykatë apo akti për përjashtim deputetësh.
Pyetje: Në perceptimin publik dhe PD që përballet në zgjedhje a nuk ishte një thellim i përçarjes përjashtimi i 4 deputetëve, përfshirë dhe ju?
Oerd Bylykbashi: Unë nuk jam i përjashtuar nga grupi parlamentar, Parlamenti nuk ka asnjë akt të tillë. Unë jam pjesë e grupit parlamentar të PD-së, as Sali Berisha nuk më heq dot. Nuk ja lejon kushtetuta, Kodi Zgjedhor e rregullorja e Kuvendit. Nuk ka asnjë gërmë në këtë hierarki normash që dikush të përjashtojë një deputet. Në gjuhë të thjeshtë ja fut kot.
Është dikush që përfiton nga kjo, e mban në lëvizje kjo gjë. Belind Këlliçi është alternativë e shkëlqyer për Bashkinë e Tiranës, denoncoi publikisht një aferë në këtë bashki ku vidheshin 500 mijë euro taksapaguesve të Tiranës dhe shifra është e krahasueshme me atë që iu zbulua pastrueses. Po t’i shohim lidhen të gjitha këto dhe del Belindi e thotë, të nesërmen përjashtohet. Pra, është interesi i Edi Ramës të zhvendosë debatin nga korrupsioni gjigant ose grabitje e hapur tek ka apo s’ka shkarkime tek PD-ja.
Pyetje: Vetëm kaq është interesi i Ramës?
Oerd Bylykbashi: Interesi i Ramës është 14 maji, ai do që rezultati i zgjedhjeve të konfirmojë kontrollin e tij mbi pushtetin ndërsa ne hyjmë për të fituar, jo për të bërë aleancë. Ne kemi vendim gjykate, s’është se po e presim dhe ka konfirmuar Kuvendin e 11 Dhjetorit, vulën e re dhe logon e re gjykata i ka njohur. Edi Rama e mban peng regjistrimin e PD-së, ka një ndërhyrje.
Pyetje: Salianji dështoi në nismën e tij për të marrë kreun e grupit parlamentar. Dështoi Salianji duke garantuar vota që ai nuk i kishte?
Oerd Bylykbashi: Ne kemi parë veprime në grupin parlamentar që kanë shkuar kundër interesave të opozitës. Janë bërë përpjekje për t’i dhënë vettingun Edi Ramës. Oferta jonë ishte të vazhdonte Vettingu por të ndërroheshin të gjithë zyrtarët e tij sepse akuzat për korrupsion dhe kapje politike janë shumë të forta, të merren të rinj. Objektivi ynë është rrëzimi i Edi Ramës. Ne mbledhim forcat bashkë për të fituar bashkitë.
