Deputeti demokrat Lulzim Basha viziton Presidencën për të dytën herë radhazi në pak ditë.
Këtë të Mërkurë, kreu i shtetit Bajram Begaj mbajti në Presidencë ceremonia e pritjes së përfaqësuesve të Trupit Diplomatik në Shqipëri.
Të pranishëm në këtë pritje ishin edhe ministrja për Evropën dhe Punët e Jashtme Olta Xhacka, Taulant Balla, deputeti demokrat Ferdinand Xhaferaj, deputetja Jorida Tabaku, ambasadorja amerikane Yuri Kim, ish kreu i demokratëve Lulzim Basha e politikanë të tjerë.
Në fjalën e tij para ambasadorëve të huaj në Tiranë, por edhe politikanëve të vendit, kreu i shtetit Bajram Begaj e nisi me luftën në Ukrainë. Begaj theksoi se Shqipëria mbetet vendosmërisht në krah të ukrainasve, e aktivisht pjesë e bashkëpunëtore e aleancës euroatlantike.
Po ashtu, presidenti ka falenderuar aleatët e partnerët e Shqipërisë në NATO, e veçanërisht Shtetet e Bashkuara “për mbështetjen e bashkëpunimin që Shqipëria t’i bëjë ballë sulmeve të natyrave të ndryshme e tentativave për të destabilizuar apo dëmtuar vendin.”
Ndërsa deklaroi se Ballkani ka bërë hapa të rëndësishëm drejt forcimit të bashkëpunimit rajonal, të shtetit të së drejtës dhe integrimit europian, Begaj tha se beson se organizimi i samitit të Ballkanit Perëndimor është shembull mirënjohjeje e vlerësimi.
