Një aplikacion i emëruar “Akt1visti” është denoncuar nga punonjës së administratës dhe opozita se po përdoret nga mazhoranca për të shantazhuar administratën publike, para zgjedhjeve lokale.
Pavarësisht kritikave, nismën e mbrojti këtë të Hënë kryetari i grupit parlamentar të Partisë Socialiste Taualnt Balla.
Ky i fundit, pas mbledhjes së grupit parlamentar socialist, mbajti një prononcim për gazetarët ku u pyet mes të tjerash edhe për shpikjen e re të “Rilidnasve” para lokaleve të 14 Majit.
Balla u mbrojt duke thënë se praktika të ngjashme si ato që përdor PS, sipas tij, ndodhin edhe në vende perëndimore si Shtetet e Bashkuara të Amerikës, apo Gjermani.
“Ashtu sikurse shumë parti te mirëorganizuara në Europë, në vitin 2020 ne filluam të bëjmë një skenë organizative ku përmbledh edhe anëtarin e partisë, edhe simpatizantin, edhe patronazhistin. Këtu pastaj filloi një histori çfarë është një patronazhist. Një mbështetës i PS ashtu si edhe i Partisë Demokratike në SHBA. Nëse do shihni një mënyre organizimi në Partinë Demokratike në SHBA do shihni të njëjtën gjë. Obama në vitin 2012 deklaronte qe fushata tradicionale mbaroi në vitin 2012, që këtej e tutje fushata do të jetë edhe në rrjete sociale. Kështu që mos u habisni kur PS të ketë fushatën e vet në rrjete sociale, por e rëndësishme është që gjithçka është e bazuar në parimet e respektimit të mbrojtjes të të dhënave personale dhe në respekt të ligjit zgjedhor”, tha ai.
Balla u pyet edhe për arrestimet në Ministrinë e Financave, ku javën e kaluar u vu në pranga Sekretari Arlind Gjokutaj dhe Fatmir Hoxha, Drejtor i Shërbimeve mbështetëse dhe çështjeve ligjore, pasi akuzohen për dëmshpërblimin në mënyrë të jashtëligjshme, dy herë, të Admir Thanës. Në përgjigjen e tij, iu kthye refrenit të kahershëm të “Rilindasve” se “përgjegjësia është personale”.
“Nuk kam asnjë koment kur bëhet fjalë për arrestime. Përgjegjësitë penale dhe ligjore janë personale, të lëmë drejtësinë të bëjë punën e vet”, u shpreh.
