Kreu i grupit Parlamentar të Partisë Socialiste, Taulant Balla deklaroi këtë të Hënë se PS do të kërkojë bisedime me opozitën për projektligjin e amnistisë fiskale si dhe zgjedhjen e avokatit të ri të Popullit.
“Do dialogojmë për të siguruar mbështetje për ligjin për amnistinë dhe Avokatin e Popullt”, u shpreh Balla në një deklaratë për gazetarët pas përfundimit të mbledhjes së grupit parlamentar të PS-së.
“Ne s’do ta lëmë vendim pa Avokat Populli. Mendoj se procesi i shpalljes së interesit do jetë i hapur dhe i pandikuar. Na duhet një avokat populli, jo i partisë, duhet të shkojmë në një konsensus me opozitën”, u shpreh më tej.
Lidhur me kthimin për rishqyrtim të ligjit për dekoratat nga Presidenti Bajram Begaj, Balla tha: “Dekreti i presidentit do të shqyrtohet me vëmendje dhe natyrshëm që do të konsultohemi me presidencën, mbi ato konstatime dhe për të adresuar sa të kemi mundësi një pjesë të rekomandimeve”.
Lidhur me arrestimet në Ministrinë e Financave, Balla tha se përgjegjësitë ligjore janë personale. “Nuk kam asnjë koment kur bëhet fjalë për arrestime. Përgjegjësitë penale dhe ligjore janë personale, të lëmë drejtësinë të bëjë punën e vet”, u shpreh.
Taulant Balla tha se gjatë mbledhjes së grupit të sotëm u është kërkuar deputetëve që të dalin në terren dhe të zhvillojnë takime me qytetarët.
Lidhur me raportimet se Olta Xhaçka u kritikua nga Rama për performancë të dobët në Kuvend, Balla e mohoi. “S’është e vërtetë që është kritikuar Xhaçka, ka një marrëdhënie korrekte me të gjthë në Kuvend”, tha ai.
