Sulmuesi holandez Wout Weghorst është lojtari më i ri i Manchester United. 30 vjeçari mbërriti në formë huazimi nga Besiktas te “Djajtë e kuq” deri në fund të sezonit.
Pas largimit pa ceremoni të Cristiano Ronaldos nga United në nëntor, Ten Hag vendosi të shtojë Weghorst në formacionin e tij sulmues. Pasi nënshkroi kontratën me klubin e njohur anglez, Weghorst tha: “Ndihem i privilegjuar që i bashkohem Manchester United.
“Kam luajtur kundër klubit në të kaluarën dhe është një ndjenjë fantastike të kem mundësinë të vesh fanellën e famshme. Unë e kam parë përparimin e United nën drejtimin e Erik ten Hag këtë sezon dhe mezi pres të filloj të luaj rolin tim në shtyrjen e ekipit drejt synimeve të tij.
Për kujtesë, Weghorst është lojtar i Burnley-t, skuadër që garon në kampionatin anglez. Besiktas e mori në huazim prej rreth tre milionë eurosh, ndërsa tashmë do të luaj sërish në Angli në skuadër edhe më të fortë.
Manchester United i pagoi Burnley-t një tarifë huazimi prej rreth 2.6 milionë paundësh për shërbimet e holandezit.
Si pjesë e marrëveshjes, Djajtë e Kuq do të paguajnë pagën e Weghorst në mënyrë të plotë, pa asnjë opsion apo kërkesë për të nënshkruar me të kontratë afatgjatë.
