Flakët që pushtuan pasditen e sotme anija ‘Kledes Mary’ në Portin e Durrësit u shuan pas një beteje prej katër orësh, ku u angazhuan edhe dy anije të Forcave të Armatosura sipas Ministrisë së Mbrojtjes.
Anija me flamur panamez në pronësi të një shqiptari u përfshi nga flakët që besohet se nisën oas një shkëndije elektrike në kuzhinën e mjetit lundrues.
Aksioni për shuarjen e zjarrit sipas MM-së nisi menjëherë pas lëshimit të thirrjes nga autoritetet portuale në Durrës, me anijet “P-133 LISSUS” dhe “P-04 SEMANI” që realizuan evakuimin e ekuipazhit të ‘Kledes Mary’.
“Dy anijet P-133 LISSUS dhe P-04 SEMANI dhe ekuipazhi i Forcës Detare në bashkëpunim me Sigurinë Portuale në Durrës arritën të vënë nën kontroll zjarrin e rënë në anijen tregtare “KLEDES MARY”. Efektivët tanë të Forcës Detare iu përgjigjën menjëherë thirrjes së autoriteteve portuale, duke evakuar në kohë ekuipazhin e anijes me flamur panamez dhe duke shmangur rrezikun për jetët njerëzore”, thuhet në njoftimin e ministrisë e cila ka publikuar edhe fotot e anijes.
Sakaq në media janë publikuar edhe pamjet nga momenti kur shuhen flakët në këtë anije.
Kujtojmë se ‘Kledes Mary’ përdoret për transport mallrash dhe ka një kapacitet deri në 2500 tonë ngarkesë.
