Afera 3 miliardë euro e portit të Durrësit do të marrë të gjithë vëmendjen e Partisë Demokratike në seancën plenare maratonë që do të zhvillohet nesër në Kuvend.
Kështu ka paralajmëruar kreu i Partisë Demokratike, Sali Berisha në mbledhjen e sotme të grupit, ku hodhi akuza të forta në drejtim të ministres së Energjisë dhe Infrastrukturës, Belinda Balluku dhe kryeministrit Edi Rama.
Berisha zbuloi skenarin që opozita do të zbatojë duke theksuar se nuk do të njohin bllokim të fjalës në Kuvend dhe tha se beteja parlamentare do jetë shumë e ashpër.
“E ka vu çështje të parë në rend dite. Ne do qëndrojmë me forcën më të madhe të fjalës, do përpiqen të na bllokojnë, nuk njohim bllokim më në Parlament se ai ka një urrejtje patologjike për fjalën, opozitën. Ndaj dhe parashikohet një betejë parlamentare shumë e fortë, shumë e fuqishme. Duhet zotërinj deputet të mbrojmë interesat e qytetarëve shqiptarë. Duhet të mbrojmë me vendosmërinë më të madhe interesat e qytetarëve shqiptarë te buxheti, të qytetarëve të Durrësit te Porti i Durrësit”, u shpreh Berisha.
Berisha tha se Porti i Durrësit është kthyer në një institucion kredidhënës, ndërsa kompania që do të hedhë themelet e portit të ri tregtar mund t’i marrë qeverisë shqiptare 200-300 milion euro, pasi në Porto Romano nuk ka projekt të ndërtuar.
“As nënshkrimi dhe përmbushja e marrëveshjeve të transaksionit nuk janë të sakta. Kompania konstaton se qeveria apo binomi Rama-Balluku mashtrojnë. Kompania thotë se kompania do të sjellë përfundimin e afatit të koncesionit para afatit të saj 30-vjeçar. Sipas relacionit shpjegues të projektligjit, projekti nuk do të pengohet. Gjithashtu thuhet se në Porto Romano do të zhvendoset aktiviteti i Portit të tanishëm të Durrësit. Por në Porto Romano nuk ekziston porti. Nëse kompania përgjegjëse e projektit e padit qeverinë shqiptare, shqiptarët duhet të paguajnë edhe 200-300 milion euro haraç”, tha Berisha.
Ai shtoi se po bëhen përpjekje nga qeveria për falimentimin e Portit të Durrësit dhe operacionet tregtare të këtij porti do i kalojnë shumë shpejtë porteve të vendeve fqinje.
“Me portin janë vërsulur Rama-Balluku-Vengu për ta falimentuar sa më parë. Me një akt të padëgjuar, porti është shndërruar në një institucion kredidhënës. I jep 5 milionë euro portit të Vlorës, i jep 4 milionë euro Albcontrollit. Duan ta falimentojnë me çdo kusht. Blihen makineri të reja, miliona e miliona euro, nuk përdoren. Porti, falë investimeve shumë serioze që janë bërë, sot ka një kapacitet përpunues prej 8 milionë ton në vit. Gjer tani, ai ka arritur në shifrën 4.8 milionë ton”, sqaroi kreu i PD.
Më tej ai shpjegoi se çfarë po ndodh realisht me aktivitetin tregtar të portit të Durrësit, duke sqaruar se “anijet do devijohen në Igumenicë, Selanik dhe në Tivar”.
“Të gjithë këtë devijim, nuk e paguan njeriu që shëtit me avion me dhomë gjumi luksoze. Ai pasurohet me apartamentet që po shiten që në ajër, pa themel. E paguajnë qytetarët e thjeshtë, e paguajnë në mallra dhe gjithçka që blejnë. A mund të veprojë një njeri në këtë mënyrë? Vetëm ai që është verbuar, që nuk ka të ngopur në të vjedhur mund të veprojë kështu. Prandaj ne të gjitha këto detaje dhe çështje madhore për Portin, duhet t’ua bëjmë të qartë shqiptarëve se çfarë po ndodh”, sqaroi Berisha.
Kujtojmë që kryeministri Edi Rama ka paralajmëruar se do jetë i pranishëm në Kuvend për të dhënë sqarimet e nevojshme lidhur me këtë marrëveshje dhe mes tij dhe Berishës pritet një debat i ashpër.
