Situata e nxehtë në Partinë Demokratike ku nga dita në ditë pritet shkarkimi i Enkelejd Alibeajt si kryetar i Grupit Parlamentar dhe me shumë gjasë zëvendësimi i tij me Ervin Salianjin, e ka vendosur selinë blu në qendër të diskutimeve politike.
Nisur nga situata e krijuar dhe vendimi i Alibeajt për përjashtimin e 4 deputetëve, analisti Andi Bushati ka “shpërthyer” përkundrejt deputetit demokrat dhe kolegëve që qëndrojnë pranë tij.
Ai i ka cilësuar pazarxhinj deputetët që mbështesin Alibeajn, të cilët siç tha janë zgjedhur në Kuvend me votat e demokratëve dhe nuk po i përfaqësojnë, madje sillen njëjtë si “ata të kërpëratave”.
“Më e keqja është se këta janë gjysma e deputetëve që po dalin ca langaraqë, pazarxhinj më të ndyrë se ajo e ‘kërpëratave’. Do respektoja çdo njeri që do thoshte nuk është Berisha e ardhmja e opozitës. Por këta janë vemje, nul, janë njerëz që nuk mund të diskutohen politikisht dhe këta përbëjnë gjysmën e deputetëve. Janë langaraqë, janë plehra, s’meritojnë të jetë aty, hanë bukën e njerëzve që kanë ngrënë dru kot”, tha Bushati në emisionin “Now”.
