Seriali i skandaleve s’ka fund, do ishin rrëzuar 3 qeveri”- Arrestimi i Arlind Gjokutaj, Berisha: Ka dy versione, njëri për hakmarrje mes zyrtarëve, tjetri…
Në konferencën e sotme për mediat kryetari i Partisë Demokratike, Sali Berisha është ndaluar te seria e skandaleve në qeverinë Rama, pas arrestimit në javët e fundit të 3 zyrtarëve të administratës për mashtrime tatimore, mitmarrje dhe drogë.
Sipas Berishës me këtë mori skandalesh, ku përfshihet edhe zbulimi i mbi 120 mijë eurove në banesën e ish-shefes së kabinetit të Arben Ahmetajt, Alda Klosi do ishin rrëzuar jo 1 por 3 qeveri.
Berisha u ndal veçanërisht në rastin e arrestimit të Sekretarit të Përgjithshëm të Ministrisë së Financave, Arlind Gjokutaj, i cili akuzohet së bashku me drejtorin Fatmir Hoxha dhe përmbaruesin Alban Ruli për “shpërdorim detyre” pasi duke rivlerësuar dy herë pronën e Ilir Thanës do t’i shkaktonin dëm prej 1.2 mln euro buxhetit të shtetit.
Për këtë çështje, ai tha se ka dy versione. Sipas Berishës, një është që Gjokutaj “ka lejuar pagesën 2 herë për të njëjtin objekt”, dhe tjetri se “ai ka zbatuar vendim gjykate dhe është hakmarrje midis zyrtarëve në nivele të ndryshme” brenda Partisë Socialiste.
“Seriali i skandaleve nuk ka fund, në treg edhe një skandal tjetër që ka dy variante. Sipas njërit variant Alind Gjokutaj ka paguar 2 herë të njëjtin objekt, por sipas një varianti tjetër, ka zbatuar vendim gjykate dhe është hakmarrje midis zyrtarëve në nivele të ndryshme. Nëse është varianti i parë, krim i shëmtuar. I dyti krim i rëndë sepse organizohen kurthe që nuk i shërbejnë luftës kundër korrupsionit, por të kundërtës. Jam marrë me këtë problem, por kam lexuar dy materiale. Në të dy variantet po bëjmë verifikim e tyre dhe do kemi qëndrimin përfundimtar për këtë çështje. Të gjitha këto rrëzojnë jo 1 por 3 qeveri. Rama bën sikur s’ka ndodhur asgjë, në vend të një dorëheqje të menjëhershme për rastin Klosi, për rastin Feron, Veliaj për largim të menjëhershëm për John Belushi vazhdojnë mashtrimin ndaj qytetarëve. Ndaj fjala u takon qytetarëve, nuk ka zgjidhje tjetër përveçse një revolucion për të përmbysur këtë regjim të pashembullt”, tha kreu i PD.
