Jorida Tabaku ka komentuar zhvillimet e fundit brenda demokratëve, kryesisht vendimin e Enkelejd Alibeaj për përjashtimin e 4 deputetët demokratë nga grupi parlamentar i PD-së.
Deputetja demokrate gjatë deklaratës së saj është distancuar nga ky vendim përçarës në kampin blu por ka theksuar se qëllimi i saj i vetëm është për të pasur një PD fituese që merret me hallet e qytetarëve.
“Besoj të gjithë më keni ndjekur, në diskutimet e mia. Jam përpjekur për të qenë konstruktive. S’më ka thirrur kush për mbledhje grupi, s’kam asnjë dijeni po mblidhen s’po mblidhen firma. Kam vetëm një qëllim, të bëjmë PD forcë fituese, të merremi me hallet e qytetarëve. Është e papranueshme për mua që të jetë PD më pak e besueshme. Do punoj cdo ditë për një qëllim kryesor, që PD të jetë sa më shpejt forcë fituese. Do jem gjithnjë pjesë e zgjidhjes dhe jo e konfliktit dhe kështu do të vijoj”, u shpreh Tabaku.
- Përjashtimi i 4 deputetëve
Partia Demokratike duket të jetë një “fuçi baruti” që vijon të prodhojë zhvillime të rëndësishme politike, kjo edhe pas vendimit absurd të Enkelejd Alibeajt për të përjashtuar nga Grupi Parlamentar katër deputetët, Tritan Shehu, Agron Shehaj, Belind Këlliçi dhe Oerd Bylykbashi.
Ky vendim duket se ka bërë që në Grupin Parlamentar të lëvizin ekuilibrat pasi është parë si i patolerueshëm nga shumë deputetë dhe zërat janë që në PD po mblidhen firmat për të shkarkuar Enkelejd Alibeajn nga detyra.
Me shumë gjasë zëvendësuesi i tij do të jetë Ervin Salianji, i cili ka marrë iniciativë të bindë deputetët demokratë që t’ia besojnë atij kryesimin e Grupit Parlamentar, parë kjo edhe si një tentativë për bashkimin e dy fraksioneve.
